Almatyda qalalyq sport basqarmasynyń burynǵy 3 qyzmetshisi sottaldy
Almaty qalalyq sotynyń málimetinshe, 2020 jylǵy qarasha – 2021 jylǵy jeltoqsan aralyǵynda Sport basqarmasy qalada keshendi sporttyq baǵdarlamalardy iske asyrý boıynsha memlekettik satyp alý konkýrstaryn ótkizgen.
Sport basqarmasynyń basshysy qarjy-ekonomıkalyq jáne joǵary jetistikter sporty bólimderiniń basshylarymen aldyn ala sóz baılasyp, laýazymdyq ókilettikterin asyra paıdalana otyryp, qyzmetterdi joǵary baǵamen satyp alǵan, sondaı-aq is júzinde oryndalmaǵan jumystarǵa aqy tólegen.
Sondaı-aq, JShS dırektory birqatar is-sharalardy ótkizýge basqarma tarapynan ruqsat alyp, marapattaý ónimderin, sporttyq jabdyqtardy satyp alý shyǵyndaryn asyra baǵalaý jáne birqatar is-sharalardy oryndamaý arqyly sporttyq jarystardy ótkizýge bólingen bıýdjet qarajatyn urlaǵany anyqtaldy.
«Sot jaza taǵaıyndaý kezinde jasalǵan qylmystyń sıpaty men qoǵamdyq qaýiptilik dárejesin, kinálilerdiń jeke basyn, onyń ishinde qylmys jasaǵanǵa deıingi jáne odan keıingi minez-qulyqtaryn eskerdi. Sottylyqtyń bolmaýy, jas balalarynyń bolýy sekildi jeńildetetin jaǵdaılar eskerildi. Aıypty aýyrlatatyn jaǵdaılar anyqtalmady», - delinedi habarlamada.
3 memlekettik qyzmetshige memlekettik qyzmette jumys isteýge ómir boıyna tyıym salyna otyryp, 3 jyldan 4 jyl 6 aıǵa deıingi merzimge bas bostandyǵynan aıyryldy. QR Prezıdentine Sport basqarmasy basshysynyń «Eren eńbegi úshin» memlekettik marapatynan aıyrý týraly usynys engizildi.
«JShS dırektoryna 7 jyl 6 aı merzimge bas bostandyǵynan aıyrý jazasy taǵaıyndaldy. Sottalǵandardan memleket kirisine 330 mln teńge somasynda materıaldyq zalal óndirildi. Úkim zańdy kúshine engen joq», - dep habarlady qalalyq sotta.
Eske salsaq, Almaty qalasy sport basqarmasynyń burynǵy basshysy 4,5 jylǵa sottalǵany týraly habarlaǵanbyz.
Aıta keteıik, buǵan deıin Almaty qalasy Sport basqarmasynyń laýazymdy tulǵalary 360 mıllıon teńgeden astam qarjyny jymqyrdy degen kúdikke ilingen bolatyn.
Keıin Sybaılas jemqorlyqqa qarsy agenttigi Almaty qalalyq sport basqarmasynyń burynǵy basshysyna jáne basqa adamdarǵa qatysty 367,5 mln teńge urlaý faktisi boıynsha tergeý aıaqtalǵanyn habarlaǵan edi.