Almatyda qalaǵa jańadan qosylǵan aýdandarda jol jóndeledi

ALMATY. QazAqparat - Almaty ákimi Baqytjan Saǵyntaev ınjenerlik jelilerdi salý barysymen jáne jol jóndeý jobalarymen tanysty, dep habarlaıdy QazAqparat tilshisi.

Qala ákimi B. Saǵyntaev Instagram paraqshasynda ınjenerlik ınfraqurylymnyń qurylysy júrip jatqan Medeý aýdanyndaǵy eldi mekenderge jasaǵan jumys sapary týraly aıtty.

«Kólsaı yqshamaýdanynda sýmen qamtamasyz etý máselesi sheshimin tapqan soń, sý burý jelisi júrgiziledi. Topyraq úıindileriniń beti ınertti materıalmen jabylady. Dárigerlik ambýlatorııaǵa arnalǵan ýchaskeni nemese úı-jaıdy anyqtaý máselesi sheshiledi» dep jazdy B. Saǵyntaev.

Keńsaı saıajaıy aýmaǵynda retsiz salynǵan qurylys saldarynan ınjenerlik jelilerge arnalǵan dálizder múldem joqtyń qasy.

Sondyqtan turǵyndardy aýyz sýmen qamtamasyz etýdiń túrli nusqalary qarastyrylady.

Dýman yqshamaýdanynda byltyr isten shyqqan 19 shaqyrym sýmen jabdyqtaý jáne 25,5 shaqyrym sý burý jelilerin jóndeý jumystary qaıta jalǵasty.

Qazir turǵyndardyń kórsetýimen atqarylǵan jumystar synaqtan ótkizilip, aqaýlar joıylyp jatyr.

Sodan soń 53 kóshe boıyndaǵy 27,4 shaqyrym joldy jóndeý bastalady.

Almaty ákimi Dýman yqshamaýdanyndaǵy 200 adamǵa arnalǵan dárigerlik ambýlatorııanyń qurylys jobasymen tanysty.

«Jumyspen qamtýdyń jol kartasy» aıasynda jóndelgen Shýhov alańyna barǵan kezde Baqytjan Saǵyntaev kólikterdiń jasyl aımaq arqyly ótýine tyıym salýdy jáne oǵan irgeles aýmaqtardy abattandyrýdy tapsyrdy.

Budan ózge, qala ákimi jóndeý-árleý jumystary júrip jatqan Áleýmettik qyzmet kórsetý úıin aralap shyqty.