Almatyda qala halqyn azyq-túlik, dári-dármektermen qamtý jumystary jalǵasýda

ALMATY. QazAqparat - Almatyda halyqty azyq-túlikpen jáne dári-dármekpen qamtamasyz etý jumystary jalǵasýda. Bul týraly Almaty qalasynyń tynys-tirshiligin qamtamasyz etýdi qalpyna keltirý jónindegi qalalyq shtaby málim etti, dep habarlaıdy QazAqparat tilshisi.

Shtabtyń taratqan málimetine sáıkes, búginde 4 naýbaıhana («Aqsaınan», «Almatynan», «Rýzınan«, «Bashırov« JK) kúnine 130 tonna áleýmettik nan shyǵarady. Áleýmettik nannyń baǵasy «Aqsaınan« – 90 teńge/bólke, «Almatynan» - 85 teńge/bólke.

Bakaleıa ónimderin óndirýshiler («Fırma «As-An« JShS), sút ónimderin óndirýshiler (»Solnechnyı« JShS, «AdalSút« JShS jáne «JLC« JShS, «Fýd Master« JShS, «RG Brands«) jetkizilimderdi shtattyq rejımde júrgizedi.

«Alsad Qazaqstan» JShS men «Alataý Qus« JShS qoımalarda jumyrtqa qorynyń jetkilikti kólemine ıe. Jetkizilimdermen barlyq saýda jelileri men iri dúkender qamtylǵan.

Sondaı -aq, 9 qańtardan bastap Magným jelisine kelisimshart jasalǵan kókónister kólemin jetkizý jolǵa qoıyldy. Sórelerdegi kartop boıynsha baǵa – 118 tg/kg, sábiz boıynsha – 127 tg/kg, pııaz boıynsha – 84 tg/kg, qyryqqabat boıynsha – 116 tg/kg.

Búginde 970 dárihananyń 877-si saǵat 9.00-den 18.00-ge deıin jumys isteıdi.

Almaty qalasynyń ýaqytsha saqtaý qoımalarynda dárilik zattar men medıtsınalyq maqsattaǵy buıymdardyń jetkilikti sany bar.

Jedel derekter boıynsha 19 dárihana zardap shekti.

Eske salsaq, Almatyǵa azyq-túlik ónimderi jetkizilip jatqanyn jazǵanbyz.