Almatyda qaharman ushqysh Hıýaz Dospanovaǵa arnalǵan kórme ashyldy

ALMATY. QazAqparat- Bıyl Halyq Qaharmany Hıýaz Dospanovanyń týǵanyna – 100 jyl. Osyǵan oraı Atyraý oblystyq tarıhı-ólketaný mýzeıi Almaty qalasynda «Esimi ańyzǵa aınalǵan qazaqtyń batyr qyzy» atty kóshpeli kórme uıymdastyrdy, dep habarlaıdy QazAqparat tilshisi.

Búgin Memlekettik ortalyq mýzeıde áýege 300 márte kóterilgen shtýrman-ushqysh Hıýaz Dospanovanyń eren erligin nasıhattaıtyn kórme ashyldy.

Arnaıy jasalǵan ekspozıtsııalyq qabyrǵalarda «Qanatty qyzdyń» jeke jáne otbasy múshelerimen, týǵan-týystarymen, jaýynger dostarymen túsken sýretteri, maıdan hattary, eńbek etken jyldarynda ıelengen marapattary kórermen nazaryna usynyldy.

Sonymen qatar, jazýshy Ábý Sársenbaevtyń batyr qyzǵa jazǵan hattary men qaharman tulǵa týraly maqalalar toptamasy qoıyldy.

Kórmege kelýshiler Hıýaz Dospanovanyń maıdanda jáne ómirde qoldanǵan jeke zattaryn tamashalaı alady.

«Kórmeniń maqsaty - Halyq Qaharmany Hıýaz Dospanovanyń erligin jastar arasynda keńinen nasıhattaý. Kóshpeli kórmege mýzeı qorynan 90-ǵa jýyq jádiger ákelindi. Jalpy, Atyraý oblystyq tarıhı-ólketaný mýzeıinde Hıýaz anamyzdyń 150-den astam eksponaty bar. Onyń 120-sy qujat pen sýret bolsa, qalǵan 30-y ózi ómirde qoldanǵan buıymy men zattary», - deıdi Atyraý oblystyq tarıhı-ólketaný mýzeıi dırektorynyń mindetin atqarýshy Dınara Beısenbaeva.

Kórmede sondaı-aq, nemis-fashıst basqynshylarymen bolǵan kúreste erlik kórsetken munaıly óńirdiń perzentteri, «Keńes Odaǵynyń Batyry» ataǵyn ıelengen Qaıyrǵalı Smaǵulov, Boran Nysanbaev, Musa Baımuhanov, Georgıı Kantsev, Muqat Mýsaev, Aleksandr Afanasev, Fılıpp Mazýrov, Ivan Mahorınder jáne «Dańq» ordeniniń tolyq ıegerleri Shúkir Erkinov, Ǵızat Alıpov, Evgenıı Polynın, Saqyp Qyzylov, Gavrııl Shamınder týraly derekter usynyldy.

Aıta keteıik, kórme 6 -12 mamyr aralyǵynda bolady. Kirý tegin.