Almatyda Ispanııa men AQSh-tan esirtki aldyryp, satyp kelgen qyz ben jigit ustaldy
Bes adam marıhýana jetkizýmen jáne satýmen aınalysqan: birge turatyn jup, olardyń dosy - betbelgi qoıýshylar jáne kýrer.
Jas juptyń qylmystyq protsestiń jetekshileri ekendigi jedel jáne tergeý is-sharalary barysynda belgili bolǵan.
27 jastaǵy L. esimdi er adam men onyń 35 jastaǵy serigi - K. esimdi áıel uıymdastyrýshy jáne úılestirýshi qyzmetin atqarǵan.
Betbelgi qoıýshy mindetin 28-30 jastaǵy eki adam oryndaǵan. Al shabarman jumysy 25 jastaǵy jigitke júktelgen.
«Qala prokýratýrasynyń úılestirýimen «Esirtki qylmysyna qarsy kúres» jobasy aıasynda júrgizilgen maqsatty jedel-izdestirý is-sharalarynyń nátıjesinde bizdiń bólimsheniń qyzmetkerleri QR ІІM EQD, QR AFM ókilderimen birlesip, messendjer arqyly baılanyssyz ádispen esirtki satýdy jolǵa qoıǵan esirtki satýshylardyń qylmystyq áreketiniń jolyn kesti», – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Tekserý barysynda kúdiktilerdiń Ispanııa men AQSh-tan poshta arqyly esirtki salynǵan sálemdemeler alǵany belgili boldy.
Taýar aqysyn tutynýshylardan Qiwi ámııan arqyly alǵan.
Qarajatty ekinshi deńgeıli bankter arqyly shyǵarǵan. Tergeýdiń osy kezeńinde 49 banktik esepshot anyqtaldy.
Erlan Álmaǵambetov kúdiktilerdiń qylmystyq áreketi resmı túrde qujattalǵanyn, «satyp alý» júrgizilgenin atap ótti.
Sonymen qatar kúdiktilerdiń turǵylyqty jerinde ruqsat etilgen tintý jumystary júrgizildi.
Negizgi aıyptalýshylardyń páterinen 6 mıllıon teńge, SIM-kartalar, bank kartalary, elektrondy tarazylar, sondaı-aq erekshe ıisi bar shısha men ósimdik zattary tabylyp, tárkilendi.
Kúdiktiler qamaýǵa alyndy.
Polıtsııa ókili QR QPK-niń 201-babyna sáıkes ózge aqparattar tergeý múddesine oraı jarııalaýǵa jatpaıtynyn eske saldy.
QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.