Almatyda ishimdikke masaıǵan er adam aspanǵa birneshe oq atqan

ALMATY. QazAqparat – Almatyda mas er adam óz aýlasynda aspanǵa qarata birneshe ret oq atty, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, oqıǵa Túrksib aýdanynda boldy. Sh. esimdi azamat kórshisine telefon soǵyp, ıtke birneshe kún qarap berýin ótingen. Áńgime barysynda ol óz-ózine qol jumsaǵysy keletinin aıtqan.

«Muny estigen áıel shuǵyl túrde «102» nómirine qońyraý shaldy. Úıge patrýldik jasaq, tergeý-jedel toby jáne Polıtsııa departamenti basshylyǵy keldi. Úı ıesi mas kúıde boldy. Aspanǵa birneshe ret oq atqan. Abyroı bolǵanda, eshkim zardap shekken joq. Bizdiń qyzmetkerler mas adamdy ustap, onyń atyna tirkelgen tegis uńǵyly myltyqty tárkiledi», – dedi Túrksib aýdandyq polıtsııa basqarmasynyń bastyǵy Erkin Amantaev.

Medıtsınalyq tekserýden keıin ustalǵan adamnyń alkogoldik masań kúıde bolǵany anyqtaldy. Atalǵan derek sotqa deıingi tergeýdiń biryńǵaı tizilimine QR QK-niń 105-baby 1-bóligi boıynsha tirkeldi.

«Sh. esimdi azamatqa ishimdikten májbúrli túrde emdelý taǵaıyndaldy. Aldyn ala boljam boıynsha, óz-ózine qol jumsaýǵa áıeliniń úıinen ketýi sebep bolǵan»,- dep atap ótti polıtsııa ókili.