Almatyda iri turǵyn úı kesheniniń qurylysy kezinde sáýlet normalary buzylǵan

ALMATY. QazAqparat - ​Almaty qalasynyń Bostandyq aýdanynda iri turǵyn úı kesheniniń qurylysy kezinde sáýlet normalary buzyldy. Bul týraly Almaty qalalyq prokýratýrasynan málim etti, dep habarlaıdy QazAqparat tilshisi.

Almaty qalasynyń prokýratýrasy Bostandyq aýdany, Sátpaev kóshesi 26/4 meken jaıynda ornalasqan iri turǵyn úı kesheniniń qurylysy kezinde sáýlet normalarynyń buzylǵanyn anyqtady.

Prokýratýranyń málimetinshe, qadaǵalaý organy eskızdik jobada halyq pen qurylys salý tyǵyzdyǵynyń ruqsat etilgen parametrleri boıynsha normalardan asqanyn, áleýmettik obektiler men bilim berý obektilerine júktemeniń týyndaýy múmkin ekendigine tıisti baǵa berilmegenin, bul balabaqshalar men jalpy bilim beretin mektepterdiń tapshylyǵyna alyp keletinin anyqtady.

«Bıylǵy ​18 tamyz kúni Bostandyq aýdany prokýratýrasynyń eskızdik jobany kelisý boıynsha ýákiletti organnyń is-áreketin zańsyz dep taný týraly talap aryzy sot sheshimimen tolyq kólemde qanaǵattandyryldy. Qazirgi ýaqytta atalǵan ýchaskede buzýshylyqtar tolyq joıylǵanǵa deıin aldyn ala qurylys jumystary toqtatyldy. Sheshim zańdy kúshine engen joq», - dep habarlady prokýratýrada.

Aıta keteıik, joǵaryda atalǵan aýmaqta qurylys salýshy «Bi-RealtyAlmaty» JShS bolyp tabylady.