Almatyda ınternet jáne mobıldi baılanys ótkizgishtigi tómen 169 oryn anyqtaldy.

ALMATY. QazAqparat – Jańa oqý jyly jáne qashyqtan oqytý formatynyń qarsańynda qala ákimshiligi qala turǵyndaryn qoljetimdi, sapaly ınternetpen qamtamasyz etý boıynsha jumysty shırata tústi, dep habarlaıdy QazAqparat tilshisi.

Almaty qalasynyń Tsıfrlandyrý basqarmasynyń basshysy Baıan Qońyrbaev málim etkendeı, qalada ınternet jáne mobıldi baılanys ótkizgishtigi tómen 169 oryn anyqtaldy.

«169 núkte boıynsha ınternet jabyndysyn jaqsartý úshin 5 qyrkúıekke deıin osy baǵytta tym bolmasa bir operatordy qosýge kepildik berildi. Sonymen birge, qala turǵyndarynyń sapaly jáne qoljetimdi ınternetti paıdalaný múmkindigi bolýy úshin sıgnaldy kúsheıtý jumystary júrgizilýde»,- dep atap ótti B. Qońyrbaev.

Tsıfrlandyrý basqarmasy basshysynyń aıtýynsha, bul baǵytta qala turǵyndarynyń radıofobııasy belgili problemalar týdyrady.

«Núkteler boıynsha máseleni jaba otyryp, biz basqa problemaǵa kezigemiz. Bul radıofobııa máseleleri. «Jas Qanat», «Shuǵyla», «Qaraǵaıly», 6-shy qala kesheni boıynsha qıyndyqtar boldy, núkteni anyqtap, antenna-machtalyq stantsııany ornatqannan keıin turǵyndarmen til tabysa almadyq, olar buǵan túbegeıli qarsy», – dedi B. Qońyrbaev.

Sonymen qatar, ol osy baǵytta aqparattyq-túsindirý jumystary júrgizilip jatqanyn aıtty.