Almatyda ınternet alaıaqtyqtyń jańa túri paıda boldy
Krımınaldyq polıtsııanyń málimetinshe, alaıaqtyq ádisi kelesideı: siz Instagram belsendi qoldanýshysyz. Alaıaqtar, ádette, adamdardy jazylýshy sanyna qaraı tańdaıdy.
«Jazylýshysy kóp kez kelgen adam «sınıaıa galochka» mártebesin alǵysy keledi – mártebe paraqshańyzdyń jalǵan emestigin jáne ony Instagram ákimshiligi rastaıtyndyǵyn bildiredi. Alaıaq sondaı azamatty tapqannan keıin Instagram-daǵy jalǵan qoldaý qyzmeti paraqshasynan baqytty adam ekenińizdi jáne sizge «sınıaıa galochka» mártebesi berilgeni týraly tikeleı sms-habarlama jiberedi. Ol úshin siz Instagram-nyń qupııa sózin engizý úshin siltemege ótýińiz kerek bolady. Qupııa sózdi engizý arqyly avtomatty túrde ótinimińiz qabyldanǵany jáne úsh kún ishinde qaralatyny týraly mátin paraqshasyna túsesiz. Birneshe saǵattan keıin paraqshańyzǵa kirý múmkindiginen múldem aıyrylasyz. Osydan keıin uıaly telefonyńyzǵa nemese vatsapqa paraqshańyzdyń buzylǵany jáne belgili mólsherde 200-1000 AQSh dollaryn tóleý kerek degen habarlamalar kele bastaıdy», – dedi Almaty qalasy polıtsııa departamenti bastyǵynyń orynbasary Rústem Ábdrahmanov.
Onyń aıtýynsha, osy tizbekti qoldaný arqyly ınternettegi alaıaqtyq faktisi boıynsha tek sońǵy birneshe kúnde alty adam Almaty polıtsııasyna shaǵym túsirgen.
«Munda azamattar qabyldaýy tıis aqparattyq qaýipsizdik sharalary mańyzdy. Árdaıym osyndaı habarlamalarǵa kúmándanyp, syn kózben qaraýyńyzdy suraımyz. Turǵyndardy saq bolýǵa jáne qyraǵylyq tanytýǵa shaqyramyz», – dedi Rústem Ábdrahmanov.