Almatyda ınternatta kórsetiletin qyzmetterdiń sapasyna monıtorıng júrgiziledi
Otyrystyń jumysyna Almaty qalasynyń máslıhat depýtaty Shavkat Omarov, Almaty qalasynyń bilim basqarmasynyń basshysy Lázzat Jylqybaeva, polıtsııa polkovnıgi, Jergilikti polıtsııa qyzmeti basqarmasynyń basshysy Manap Sattarov, «Qazaqstannyń balalar úıi túlekteriniń assotsıatsııasy» ZTU prezıdenti Rafael Gasanov qatysty.
Komıssııa arnaıy ınternattyq uıymdardyń jumysyn jetildirý, bilim salasynda kórsetiletin qyzmetterdiń sapasyn arttyrý, balalar úıi túlekteriniń jumysqa ornalasýyna járdemdesý, qylmystyń aldyn alý máselelerin qarady.
Qalalyq bilim basqarmasy basshysynyń orynbasary Gúlnar Aıtqulovanyń, qoǵamdyq densaýlyq saqtaý basqarmasy basshysynyń orynbasary Ásel Bısenbaevanyń, ıývenaldy polıtsııa basqarmasynyń basshysyi Leıla Álipbaevanyń baıandamasy tyńdaldy.
Almatyda 18 mektep-ınternat bar, olarda 3 640 bala turady. 8 túzetý mektep-ınternattarynda 2 542 bala tárbılenýde, olardyń arasynda sóıleý, estý kemistigi bar balalar, sonymen birge jetim balalar da bar. Barlyq mekemeler sheberhanalarmen, oıyn zaldarymen jáne medıtsınalyq pýnkttermen jabdyqtalǵan. Sońǵy úsh jylda uıymdardyń tárbılenýshilerine, jetim balalar men ata-ana qaraýynsyz qalǵan balalarǵa 259 páter berilgen.
Sýıtsıdtiń aldyn alý maqsatynda Psıhıkalyq densaýlyq ortalyǵynyń negizinde psıhologtardyń onlaın keńes berý jumysy uıymdastyryldy. Osy kezge deıin 29 adamǵa keńes berilip, sońǵy 4 aıda senim telefonyna qala turǵyndarynan 1035 qońyraý kelip tústi. Qońyraý shalýshylardyń bárine bilikti mamandardyń psıhologııalyq kómegi kórsetildi. Sonymen birge, bilim berý júıesiniń 148 mamany oqý semınarlaryna qatysty. Áleýmettik pedagogtar, medıtsınalyq qyzmetkerler jáne basqa da mamandar arasynan 4 aýdanda 206 adam úıretý kýrstarynan ótti.
Almaty qalasynyń bilim basqarmasy júıeli túrde ınternattyq mekemeler qyzmetin anyqtalǵan tártip buzýshylyqtardy kórsete otyryp jáne olardyń joıylýyn baqylaýǵa ala otyryp, monıtorıng júrgizedi. Tekserý barysynda memlekettik satyp alý, eńbek zańnamasy, sanıtarlyq jáne órt normalarynyń buzylýy syndy tártip buzýshylyqtar anyqtaldy. Nátıjesinde anyqtalǵan tártip buzýshylyqtyń bári joıyldy. Arnaıy mektep-ınternattardyń birqatar dırektorlary men dırektor orynbasarlary tártiptik jaýapkershilikke tartyldy.
Almaty qalasy ákiminiń orynbasary Erjan Babaqumarov balalardyń sapaly bilim jáne tárbıe alýy, tamaqtanýy, sonymen qatar, 29 jasqa tolmaǵan jetim balalardy baspanamen qamtý syndy máselelerge basa nazar aýdardy.
«Balalar – bizdiń bolashaǵymyz. Internat jetekshileri bizdiń balalardyń ómiri men qaýipsizdigine jeke basymen jaýapty. Tárbılenýshilerdiń zańdy quqyqtary men múddelerin buzý faktilerin jasyrýǵa múlde jol bermeý kerek», - dep atap ótti Erjan Babaqumarov.
Qalalyq bilim basqarmasy men bilim jetekshilerine tártip buzýshylyqtardyń aldyn alý, ınternattyq uıym túlekterin jetekshilik jáne basqa da ınstıtýttardy qatystyra otyryp jumysqa ornalastyrý máseleleri boıynsha jumysty kúsheıtý tapsyryldy. Bir aı ishinde júrgizilgen jumystar jáne aldaǵy kezeńdegi atqarylýy tıis mindetter jóninde qamqorlyq keńesin ótkizý tapsyryldy.
Almaty qalasy boıynsha bilim salasyn baqylaý departamenti men Qazaqstannyń balalar úıi túlekteri assotsıatsııasyna qalalyq ınternattyq uıymdar kórsetetin qyzmetter sapasynyń mejege sáıkes bolýy jóninde monıtorıngtik komıssııa qurý tapsyryldy.
Tekserýden bólek, balalar arasynda saýalnama da júrgiziledi. Saýalnama barysynda ákimshiliktiń aralasýyna jol berilmeıdi.
Tekseristerdiń ádil bolýyn qamtamasyz etý úshin úkimettik emes uıym men buqaralyq aqparat quraldary ókilderi de qatysady.