Almatyda ınnovatsııalyq aıaldamalar paıda bolady
Almatyda «Science Slam - Kazakhstan» ǵylymı shoýy QR Tuńǵysh Prezıdenti qorynyń uıymdastyrýymen osymen úshinshi ótkizilip otyr. Búgin fınalǵa shyqqan 7 jas ǵalym aqyldy aıaldama, ınnovatsııalyq qoqyshana, shokolad prınteri týraly aıtty.
Science Slam - jas ǵalymdardyń stand up formatyndaǵy saıysy. Ár qatysýshy 10 mınýt ishinde óziniń ǵylymı jańalyǵyn jan-jaqty tanystyryp úlgerýi tıis.
Nátıjesinde, L.Gýmılev atyndaǵy Eýrazııa ulttyq ýnıversıtetiniń stýdenti Rafael Hısamýtdınov «Qatty turmystyq qaldyq konteınerlerin qashyqtyqtan basqarýdyń ıntellektýaldy júıesi» jobasymen birinshi oryn aldy.
Kúmis medalǵa ıe bolǵan Halyqaralyq Aqparattyq tehnologııalar ýnıversıtetiniń stýdenti Nurlan Kárimjanov kún energııasymen qýattandyrylatyn "ecoStation" aqyldy aıaldama ıdeıasyn usyndy.
Úshinshi orynǵa «Eýrazııa ekonomıkalyq odaǵy aıasynda tutynýshylar minez-qulqynyń kros-mádenı aspektileri» jobasymen Turan ýnıversıtetiniń stýdenti Gúlıra Abraeva laıyqtaldy.
«Innovatsııalyq aıaldamada telefondy qýattaýǵa bolady. Ol úshin energııa kún batareıalarynan alynady. Túnde aıaldama jınaqtalǵan energııamen jaryqtanady. Sondaı-aq eki baqylaý kamerasy, tegin Wi-Fi, 42-dıýımdy úlken ekran, «Sıtı-roýter-navıgator» bolady. Qala turǵyndary úsh tilde aqparat ala alady. Qalanyń bir buryshynan ekinshisine qalaı jetýge bolady, qandaı kórikti oryndar bar degen sııaqty. Biz aýa lastanýyn tym bolmasa 15-20%-ǵa azaıta alamyz dep senemin», - dedi Nurlan Kárimjanov.
Aıta ketý kerek, mundaı aıaldamalardyń biri qazir Jandosov-Manas kósheleriniń qıylysynda tur.
Qalada taǵy 6 aıaldama jasaý týraly kelissózder júrgizilip jatyr.
«Talantty jastardy, jas ǵalymdardy qoldaý maqsatynda N.Nazarbaev atyndaǵy qor tek grant taratýmen shektelip qalmaı «Science Slam» sııaqty mańyzdy sharalardy ótkizip keledi. Bul jastardyń arasynda ǵylymǵa, bilimge degen qushtarlyqty oıatý úshin júzege asyrylady. Bul ońaı jumys emes, árıne. Biraq úshinshi jyl qatarynan qatysýshylardyń deńgeıi artqanyn, jobalar sapasynyń jaqsarǵanyn atap ótýge bolady», - dedi Qordyń Almatydaǵy ókili Sergeı Toqtarov.