Almatyda І Halyqaralyq jas ǵalymdar forýmy bastaldy
Іri ǵylymı sharany Nursultan Nazarbaev qory janyndaǵy Ǵylymı keńes uıymdastyrady. Sonymen birge, Qazaqstan Respýblıkasy Ulttyq ǵylym akademııasy men QR Bilim jáne ǵylym mınıstrligi Qazaqstan Táýelsizdiginiń 30 jyldyǵyna arnalǵan Forýmdy ótkizýge qoldaý kórsetedi.
«Táýelsiz Qazaqstannyń zııatkerlik áleýeti: qalyptasýy men damýyna 30 jyl» I Halyqaralyq jas ǵalymdar forýmyna 14 elden 200-ge jýyq spıker men baıandama jasaýshylar qatysady. Olar: Qazaqstan, Belarýs, Ulybrıtanııa, Germanııa, Kanada, Qytaı, Latvııa, Portýgalııa, Reseı, AQSh, Tájikstan, Túrkııa, Ýkraına, Frantsııa elderinen keledi.
Ǵylymı forýmnyń maqsaty – ǵalymdardy, saıasatkerlerdi, óndiris jetekshilerin, azamattyq qoǵam men BAQ ókilderin jınap, ulttyq ǵylymdy damytýdyń ózekti máselelerin talqylaý.
Forýmnyń baǵdarlamalyq is-sharalary barysynda Qazaqstannyń táýelsizdik jyldaryndaǵy jetistikterine taldaý jasalady.
Forýmnyń negizgi qatysýshylary — jas ǵalymdar. Olar ǵylymı jobalar kórmesinde óz ıdeıalaryn usynady. Sonymen qatar, «Jasyl álem» jáne «Tulǵa men qoǵam» ǵylymı sessııalarynda salany damytýǵa arnalǵan bastamalar men usynystaryn aıtady dep kútilýde.