Almatyda Hmelnıtskıı kóshesi Talǵar tasjolyna deıin uzarady

ALMATY. QazAqparat - Almatyda taǵy bir kóshe uzarady. Qazir jobalaý-smetalyq qujattamasy ázirlenip jatyr, dep habarlaıdy QazAqparat tilshisi.

Almaty ákimi Erbolat Dosaevpen kezdesýge kelgen Túrksib aýdany turǵyndarynyń biri Hmelnıtskıı kóshesine qatysty suraq qoıdy.

«Internette Almatynyń joldaryn uzartý syzbasy paıda boldy. Súıinbaı, Bogdan Hmelnıtskıı kóshelerinen Jumabaevqa deıingi jol bar. Meniń bilgim keletini - bul bekitilgen uzartý jospary ma?» dep surady turǵyn.

Shahar basshysy qalanyń 2040 jylǵa deıingi bas jospary bekitilgenin atap ótti. Joba aıasynda Hmelnıtskıı kóshesi Talǵar tasjolyna deıin uzarady.

«Bizge túzý jol qajet, qısyq, tar joldardyń tıimdiligi shamaly. Biz búkil ınstıtýttardy tartyp, kólik baǵyttaryn birge qarastyrdyq. Bul Almatynyń ortalyǵyndaǵy úlken magıstraldyq kóshelerdi uzartýǵa da qatysty. Ókinishke qaraı, qala basqasha damı almaıdy. Barlyq basqa máseleni naryqtyq baǵamen sheshemiz, eshkimdi renjitpeımiz»,-dedi ol.

Almatynyń qalalyq mobıldilik basqarmasynyń basshysy Saǵyndyq Telibaev Hmelnıtskıı kóshesin Talǵar tasjolyna deıin uzartý úshin jobalyq-smetalyq qujattama ázirlenip jatqanyn jetkizdi.

«Bogdan Hmelnıtskıı kóshesin uzartý bas josparmen bekitilgen. Búginde biz jobalyq-smetalyq qujattamany ázirlep jatyrmyz, sáýletshiler qyzyl syzyqtardy anyqtady»,- dep túsindirdi basqarma basshysy.