Almatyda halyqtyń áleýmettik osal toptary gazǵa tegin qosylady
Qala ákimi keltirgen derekke súıensek, Almatyda 2 jyl ishinde gazben jabdyqtaý jelilerine 3,8 myńnan astam turǵyn úı qosyldy. Búginde turǵyndardyń 99,2% ortalyqtandyrylǵan gazben qamtylǵan.
«Qazirgi ýaqytta 1497 turǵyn úı, onyń ishinde halyqtyń áleýmettik osal toptary gazǵa qosylmaǵan kúıinde qalyp otyr. Qala bıýdjeti esebinen halyqtyń áleýmettik osal toptaryn gazǵa tegin qosamyz»,- dedi ákim.
Sonymen qatar, ol «Jańa Almaty» irgeles aımaqtardy damytýdyń keshendi jospary aıasynda 428 joba iske asyrylyp jatqanyn atap ótti.
«2 jyl ishinde 178 joba iske asyryldy, 177 joba iske asyrylý satysynda, 73 joba kelesi jylǵa kózdelgen. Jospar boıynsha jyl saıynǵy qarjylandyrý shamamen 200 mlrd teńge. Búginde Úkimetpen jospar jobalary boıynsha qarjylandyrýdy ulǵaıtý máselesin talqylaýdamyz», - dedi Baqytjan Saǵyntaev.
Sondaı-aq ol qalanyń kommýndaldyq ınfraqurylymyn damytý jumystary jalǵasyn tabatynyn jetkizdi.
«2021 jyly Rysqulov – Emtsov jol aıryǵynyń qurylysy aıaqtaldy, Alataý kóshesin tesý, Abaı boıynsha qozǵalys ashyldy, Taýsamaly shaǵynaýdanynda Qonaev kóshesin qaıta jańartý aıaqtaldy, Alataý, Naýryzbaı jáne Túrksib aýdandarynyń 8 shaǵynaýdanynda, atap aıtqanda Alǵabas, Shańyraq-5, Samǵaý, Ójet, Álmerek, Qaırat, Nurshashqan, Quramysta 65 shaqyrymdy jańa jol salyndy», - dedi ákim.
Baqytjan Saǵyntaev bıyl Buqtyrma – Qulja jol aıryǵy boıynsha jumystar aıaqtalatynyn jetkizdi.
«Sonymen qatar Seıfýllın – Jansúgirov qıylysyndaǵy qozǵalys ashylady. Áýezov kóshesin uzartý jumystary aıaqtalady, Saıyn kóshesin uzartý jalǵasady, Tóle bı kóshesin uzartý jumystary bastalady. Alǵabas, Álmerek, Qaırat, Shuǵyla, Aqjar jáne Shapaǵat shaǵyn aýdandarynda 100 km jańa jol salynady»,- dep qosty Shahar basshysy.