Almatyda halyqaralyq «JasSTAR» shyǵarmashylyq festıvali ótti
«Jańa esimderdiń on jyldyǵy» uranymen ótken festıvaldi QR Tuńǵysh Prezıdenti – Elbasy qory uıymdastyrdy. Aýqymdy jobany Almaty ákimdigi de qoldady.
Festıval qatysýshylary men qonaqtaryn qala ákimi Baqytjan Saǵyntaevtyń atynan shahar basshysynyń orynbasary Erjan Babaqumarov quttyqtady.
«Jastar arasynda óner men mádenıetti jan-jaqty damytýdy maqsat etken festıval óziniń on jyldyǵyn atap ótýde. Atalǵan shara ár elden kelgen jastardyń basyn qosyp keledi. Jyl saıyn festıvalge qatysýǵa nıet bildirýshiler qatary artyp otyr. Bul – kópshilikke óz talantyn pash etip, shyǵarmashylyq kókjıegin keńeıtýge jáne jańa tájirıbe alýǵa tamasha múmkindik», - delingen quttyqtaý hatta.
Bıyl óner men mádenıet salasyndaǵy jastardy jan-jaqty damytýǵa arnalǵan bastamaǵa 10 jyl toldy. Jyl saıyn festıval aıasynda Qazaqstannyń shyǵarmashylyq oqý oryndarynyń stýdentteri men jas mamandaryna arnap ártúrli elderdiń tanymal mádenı qaıratkerleriniń shyǵarmashylyq kezdesýleri, sheberlik sabaqtary, dáristeri, trenıngter men semınarlar ótedi.
Búginge deıin «JasSTAR»-ǵa stsenarıst jáne kınorejısser Egor Konchalovskıı, mýzykant jáne prodıýser Baıǵalı Serkebaev, Parıj operasy Ulttyq orkestriniń dırıjeri Fılıpp ıÝı, ataqty sýretshi-stılıst M. Lamın, birinshi skrıpkashy, «Máskeý Vırtýozy» orkestriniń solısi Alekseı Lýndın kelgen bolatyn. Bul mádenı-aǵartýshylyq jobanyń maqsaty – jastar arasynda mádenıettiń damýyna jáne talantty jas sýretshilerdiń shyǵarmashylyq áleýetiniń artýyna yqpal etý.
Bıylǵy festıval «Broadway musical shows» formatyndaǵy mıýzıkl-kontsert túrinde ótti. Ár jyldaǵy «JasSTAR» qatysýshylary, sonymen qatar, elimizdiń eń úzdik shyǵarmashyl jastary álemdik mıýzıklderdiń úzdik hıtterin oryndady. Festıval baǵdarlamasynda «Uly shoýmen», «Sulý men qubyjyq», «Romeo men Djýletta», «Chicago», «Dostar serti», «La-la lend», «Mamma mia» jáne basqa da mýzykalyq kompozıtsııalar oryndaldy.