Almatyda ǵylym men tehnıka salasyn jáne ǵylymdy uıymdastyrýdy basqarý qurylymyndaǵy ózgerister talqylanýda

ALMATY. Jeltoqsannyń 23-i. QazAqparat /Názıra Eleýhan/ - Qazaqstanda ǵylymdy basqarý salasynda   qurylymdyq qaıta qurý qajettiligi  týyndap otyr. Bul týraly búgin ótken arnaıy baspasóz máslıhatynda ǵylym qyzmetkerleri kásipodaq komıtetiniń tóraǵasy Marat Moldahmetov málimdedi,

dep habarlaıdy QazAqparat.

Onyń aıtýynsha,  2009 jylǵy qyrkúıektiń 4-indegi Qazaqstan ǵylymyn jáne ǵylym júıesin damytý máseleleri boıynsha jumys keńesi barysynda jáne Ál-Farabı atyndaǵy QazUÝ-niń 75 jyldyq mereıtoıynda oqyǵan dárisi kezinde Elbasy memleket ekonomıkasyn ártaraptandyrýda ǵylymnyń rólin arttyrý jáne ǵylym men ekonomıkanyń tyǵyz yqpaldasýynyń qajettiligi týraly mindetter qoıdy.

«Elimizde ǵylym men tehnıka salasyn memlekettik basqarýdyń tutas, naqty úılestirilgen júıesi qurylmaǵan. Onyń basty sebepteriniń biri - Qazaqstanda oryn alyp otyrǵan ǵylymdy «kólbeý» basqarý shemasy. Bul basqarý shemasynda kez kelgen mınıstrlik pen vedomstvoda negizinde basqa ǵylymı uıymdarmen ózara árekettesýge túspeıtin «jeke» ınstıtýttar qurylyp, jumys jasaıdy jáne árbir vedomstvo óziniń jeke «ǵylymı» saıasatyn júrgizedi», dedi  Marat Moldahmetov.

Qazaqstandaǵy ǵylym men ekonomıka baılanysynyń tıimdiligin arttyrý boıynsha usynystardyń arasynda Úkimet qurylymynda ǵylym men jańa tehnologııalar boıynsha jeke memlekettik organdy qurý týraly pýnkt bar.          «Mınıstrlik nemese agenttik deńgeıinde qurylýy tıis bul organ memlekettiń ǵylymı jáne tehnologııalyq damýyn basqarýdyń «tik» júıesiniń negizine aınalýy tıis. Ol basqa salalas memorgandarǵa qatysty sáıkes quqyqtar men ókilettilikterge ıe bolýy jáne memlekettiń tehnologııalyq damýynyń orta jáne uzaq merzimdik basym baǵyttaryn anyqtap, ǵylymı ıdeıalardyń tájirıbede tıimdi júzege asyrý baǵdarlamasyn jasap shyǵarýy tıis», dep sanaıdy  Marat Moldahmetov.

Hımııa ǵylymdarynyń doktory, QR Ǵylym odaǵynyń atqarýshy dırektory Rınat Ysqaqovtyń aıtýynsha, mundaı organdy baıaǵydan qurý kerek edi.

«Búgingi jaǵdaıda ǵylymdaǵy jyldar boıy jalǵasyp kele jatqan daǵdarystyq jaǵdaıdan shyǵýdyń jalǵyz durys sheshimi ǵylymǵa bólinetin bıýdjet qarjysyn basqarýshy jáne basty memlekettik tapsyrys berýshi retinde ǵylym men jańa tehnologııalar agenttigin qurý týraly sheshim bolyp tabylady dep esepteımiz», dedi Rınat Ysqaqov.