Almatyda Gorkıı saıabaǵynda stýdentter jataqhanasy salynady
13:31, 16 Aqpan 2021
ALMATY. QazAqparat - Almatyda Maksım Gorkıı atyndaǵy ortalyq saıabaqta Abaı atyndaǵy Qazaq ulttyq pedagogıkalyq ýnıversıtetiniń stýdentteri úshin jataqhana salý josparlanyp otyr, dep habarlaıdy QazAqparat tilshisi.
Almaty ákimidigi osy máselege baılanysty qala turǵyndaryn qoǵamdyq tyńdaýǵa shaqyrady.
«1 naýryz tańǵy saǵat 10:00 kezinde Gorkıı atyndaǵy saıabaqta ashyq jınalys formatynda qoǵamdyq tyńdaý ótedi. Qoǵamdyq tyńdaýdy uıymdastyrý qalalyq jasyl ekonomıka basqarmasyna júktelgen» dep habarlady qalalyq ákimdikten.
Ortalyq saıabaqta 327 orynǵa arnalǵan alty qabatty stýdentter jataqhanasy boı kóteredi.
Tapsyrys berýshi - Abaı atyndaǵy Qazaq ulttyq pedagogıkalyq ýnıversıteti.
Turǵyndar eskertý men usynystaryn qoǵamdyq tyńdaý ótetin kúnge deıin úsh jumys kúninen keshiktirmeı almansur_almaty@mail.ru elektrondy poshtasyna joldaýy kerek.