Almatyda Gınnes rekordyn ornatatyn quraq kórpe qalaı tigilip jatyr

ALMATY. QazAqparat - Almatyda Naýryzda bastaý alǵan ataqty quraq kórpeni tigý protsesi qyzý júrip jatyr. Almatylyq sheberler qala kúnine deıin portýgal kórpesin basyp ozýǵa baryn salyp jatyr, dep habarlaıdy QazAqparat tilshisi. 

Aptanyń ár senbisi men jeksenbisi qaladaǵy Arbat alańy úlken sheberhanaǵa, naǵyz rýhanı jańǵyrý alańyna  aınalady.

Munda rekordtyq Quraq kórpeni tigýge qalalyq kitaphanalar jelisiniń qyzmetkerleri ǵana emes, ár qala turǵyny, zeınettegi apalar kelip kómektesip jatyr.

Qazaq halqynyń kóne qolóner murasyn qyzyqtap, kelip, bir bólshegin bolsyn qurap berip jatqan turǵyndardyń sany óte kóp.

Rekordty kórpeni tigýge Almaty qalalyq kitaphanasynyń sheberleri jumyldyrylǵan.

22 naýryzda alǵashqy quraǵy tigilgen eni 2,5 metr, uzyndy 4 shaqyrym bolatyn quraq kórpeniń búginde oıý-órnekti kózderi birtindep quralyp keledi. Іsmerler 1 aı ishinde 975 metr quraq daıyndady.

Olar senbi-jeksenbi kúninen bólek jumys ýaqytynda da ár kitaphanada qyzý jumys isteýde.

20 jastaǵy qyzdardan bastap 60-ty eńserip qalǵan ájeler besjuldyz, qııaq, sharshy, qııaqgúl, raýshan gúl, qoshqar múıiz, shahmat formasynda túrli quraq qurap jatyr.

Árkim óz oıyndaǵy qııalyn qaǵaz betine túsirip, shyǵarmashylyq  eskızben jasaýda.

Keıin bul quraqtardyń barlyǵy ortaq kontseptsııamyn birigetin bolady.

«Men ózim zeınettegi kisimin. Balalarym ósip óz aldyna shańyraq quryp ketti. Mentaldy ýnıversıtette qyzmet jasaımyn. Jumystan, nemerelerimnen bos ýaqytymda osynda kelip kórpe quraımyn. Qazirgi jastar ıne ustamaıdy, túıme qadaýdy bilmeıdi. Osynyń barlyǵyn jastarǵa úlgi retinde kórsetip jatyrmyn. Qala kúnine úlesimdi qosaıyn dep kelip otyrmyn. Qazaq salty úshin kórpe quraý óneriniń mańyzy zor. Qyz turmysqa shyqqanda da 9-y (jasaý) bar ma eken dep suraıtyndar bolady. Quraq kórpeniń de óz jón-joralǵysy bolady. Qyzǵa 9-11 kórpe beredi. Onyń tórge tóseıtin kórpesi bar, jamylatyn kórpesi bar. Ulǵa 5 kórpe beredi. Ol enshi dep aıtylady. Odan bólek qonaq kórpe, qudaǵı kórpe, jas jubaılarǵa arnalǵan  aqqý mahabbat kórpeleri bolady», - dedi S.Begalın atyndaǵy balalar kitaphanasyna erikti retinde tirkelgen Gúlsim Bulantaeva.

«Túrli oıý oıyp, kórpe tigý  tatar halqynyń dástúrinde de bar. Qazir bizdiń turmysymyzda qansha mata  artylyp jatyr. Onyń bárin qoqysqa tastap jatyrmyz. Odan da osyndaı maqsatta paıdalansa, úıimizge qajet jıhaz bolady», - dedi tatar ultynyń ókili, almatylyq Farıda Gabdýlova.

Tigin tigýge kelgen kelinshekterdiń arasynda kitaphana qyzmetkerlerinen bólek qala turǵyndary, eriktiler de bar.

«Kórpe quraý - kóp adamnyń hobbıi. Ol adamdy stressten, oıdan aryltady. Adam tigip otyryp oıǵa oı qosady. Qııaly qaǵaz betine túsedi. Kópshilik quraq tikkennen lázzat alady. Tipti kórpe quraýdy bızneske aınaldyrǵandar da bar. Qalanyń bolsyn, aýyldyń bolsyn turǵyndarynan kórpege suranys óte joǵary. Bizdiń aktsııa bastalǵaly kitaphanalarǵa oqyrmandarymyz túrli matalar, jipterin ákep berip jatyr», - dedi №33 kitaphananyń meńgerýshisi Isabekova Qýanysh.

Sheberler Arbatta úlgere almaı qalǵan jumystaryn úıdi-úılerine alyp ketip, úıirmedegi sheberhanalarda tigin mashınasymen jalǵastyryp jatyr.

«Quraq kórpe degen quralǵan degen maǵynany bildiredi. Bul ıaǵnı, ata-babamyzdyń salt-dástúrinde jastardyń basy quralsyn, kóbeısin degen tilekten týady. Myna qarańyz, orysymyz, qazaǵymyz bárimiz jabylyp qurap jatqan kórpemiz - respýblıkamyzdaǵy barsha ult ókilderiniń basy quralsyn, biriksin degen tamasha ıdıany bildirse kerek», - dedi S.Begalın atyndaǵy balalar kitaphanasynyń ádiskeri Rázııa Tájıeva. 

Qala turǵyndary men ismerleriniń, qonaqtarynyń qoly tıgen, izi qalǵan quraq kórpeni 22 qyrkúıek qala kúninde Gınnes rekordtar kitabynyń ókili kelip, ólsheıtin bolady. 

4 shaqyrymdyq kórpe birneshe bólikterge bólinip, qaladaǵy keńselerge syıǵa tartylyp, mýzeılerge eksponat retinde qoıylady.

Aıta ketý kerek, buǵan deıingi uzyn kórpe rekordy  2000 jyly Portýgalııanyń Porto qalasynda jasalǵan. Onda  uzyndyǵy 25100 sharshy metr «Manta da Cultura» kórpesi tigilgen.

«Quraq kórpeniń ár bólshegi Otanymyzdyń san alýandyǵyn:  onyń dalasyn, taýy men ózenin kórsetedi,  al basty sımvol - halyqtyń birligi. Qazaqstanda 130-dan astam  ult turady.  Kórpeniń quraqtary tutas jamylǵyǵa aınalyp, elimizdiń tutastyǵyn pash etedi», -  dedi jobanyń basty uıymdastyrýshysy Almaty qalasy Mádenıet jáne muraǵattar basqarmasy.