Almatyda ǵasyr jasaǵan maıdangerge qurmet kórsetildi
Almatyda Ulttyq ulannyń áskerı qyzmetshileri Qaıyrly Jońqabaevty kele jatqan Jeńis kúni merekesimen quttyqtady. Sonymen birge QR Ulttyq ulany «Ońtústik» óńirlik qolbasshylyǵy qolbasshysynyń orynbasary polkovnık Nııaztaı Álkeshev maıdangerge Alǵys hat tabystap, «QR quqyqtyq tártip áskerine 30 jyl» merekelik medalimen marapattady.
Osydan soń ardager úıiniń aýlasynda Ulttyq ulannyń 5571 áskerı bóliminiń orkestri soǵys jyldaryndaǵy áskerı ánderdi oryndasa, jas sarbazdar saltanatty marshpen júrip ótti.
«Búgin biz Ekinshi dúnıejúzilik soǵys ardageri Qaıyrly Ýataıulyn Jeńis kúniniń 77 jyldyǵymen quttyqtap, onyń batasyn alaıyq dep keldik. Bıyl ardager 101 jasqa tolady. Jalpy, «Ońtústik« óńirlik qolbasshylyǵynda búginde kózi tiri soǵys ardagerleri qalǵan joq. Eki tyl ardageri bar. Olardy da quttyqtap, úılerine baramyz. Bizden bólek, qarııalarǵa Ardagerler keńesi de ózderiniń syı-sııapattaryn kórsetti», - dedi Nııaztaı Álkeshev.
Óz kezeginde maıdanger Qaıyrly Jonqabaev sarbazdarǵa aq batasyn berdi.
«Denderiń saý, ómir jastaryń uzaq bolsyn! Áskerı boryshty óteý ońaı emes. Degenmen, komandırdiń tilin alyp, áskerı boryshty jaqsy oryndańdar. Elimizde tynyshtyq, amandyq, bereke bolsyn! Maǵan kelip, quttyqtaǵandaryń úshin kóp rahmet!», - dedi aqsaqal.
Qaıyrly Jońqabaevtyń uly Erkin Jońqabaev ákesi Otandy súıý týraly jıi aıtatynyn jetkizdi.
«Ákemiz Panfılov dıvızııasynyń sońǵy jaýyngeri. Biz ony maqtan tutamyz. Ol bizdi árqashan adal bolýǵa, eńbek súıgish, Otan súıgish bolýǵa tárbıeledi. Búginde onyń bes balasy, on nemeresi men on bes shóberesi bar. Ol bizge soǵys ońaı bolmaǵanyn, eki adamǵa bir vıntovka berilgenin aıtatyn. Ákemiz oǵan shydamaı, joldasymen birge qoldaryna pýlemet alyp, maıdannyń alǵy shebinde jaýmen shaıqasqan. Sondaı-aq ákemiz qan maıdanda joldastaryńnan aıyrylǵan óte aýyr bolatynyn aıtty», - dedi Erkin Jońqabaev.
Maıdangerdiń nemeresi Nurlan Hasenbaevtiń sózinshe, atasy soǵys týraly kóp áńgimeleýdi unatpaıdy.
«Jalpy ol kezde qıyn boldy ǵoı. Atamyzǵa da ońaı bolmaǵany anyq. Sol sebepti de ol nemerelerine sol bir jyldar týraly aıtqysy kelmeıtin shyǵar. Biz onyń sol ýaqytta óz Otanyn, otbasyn qorǵap, Otan aldyndaǵy boryshyn adal oryndaǵanyn jaqsy túsinemiz», - dedi Nurlan Hasenbaev.
Aıta keteıik, Ekinshi dúnıejúzilik soǵys ardageri Jońqabaev Qaıyrly Ýataıuly 1921 jyly 10 qyrkúıekte Shyǵys Qazaqstan oblysy, Samar aýdanynda dúnıege kelgen. Eńbek jolyn 1940 jyly ShQO Qulja orta mektebinde muǵalim bolyp bastaǵan. 1941 jyly qazan aıynda Panfılov dıvızııasynyń 23-shi gvardııalyq polkine Qyzyl ásker jaýyngeri qataryna alyndy.
Ardager soǵysqa basynan aıaǵyna deıin qatysqan. 8-gvardııalyq atqyshtar dıvızııasy quramynda pýlemetshi bolǵan, Keńes Odaǵynyń Batyry Málik Ǵabdýllınmen bir rotada shaıqasqan. Belarýs, Polsha jáne Estonııany azat etýge qatysqan. 1943 jyly aqpanda Rjevtegi qandy maıdanda aýyr jaralanǵan, jeńisti Drezdende qarsy aldy.
Soǵystan keıin Samar aýdandyq atqarý komıtetinde bólim meńgerýshisi bolyp istedi. Ári qaraı aýdandyq tutynýshylar odaǵynyń júıesinde basshylyq laýazymdarda bolǵan. 1970 – 1983 jyldary Almatydaǵy «obşepıt» júıesinde sharýashylyq esepteriniń dırektory boldy. 1983 jyly qurmet demalysyna shyqty, bes bala tárbıelep ósirdi.
Erlikteri úshin «Qyzyl Juldyz» jáne ІІ dárejeli «Otan soǵysynyń» ordenimen, «Erligi úshin», «Máskeýdi qorǵaǵany úshin» medaldarymen jáne basqa da kóptegen medaldarmen marapattalǵan.
2020 jyly Qaıyrly Jońqabaev QR Ulttyq ulany uıymdastyrǵan «Biz – Jeńistiń muragerimiz!» atty taǵzym estafetasy úshin alǵys aıtyp, Prezıdent Qasym-Jomart Toqaevqa hat jazǵan bolatyn. Óz kezeginde Memleket basshysy maıdangerge jyly lebizi úshin alǵys bildirip, uzaq ǵumyr tiledi.