Almatyda ǵalymdar Tóleýtaı Raqymbekovtiń saılaýaldy baǵdarlamasyn talqylady

NUR-SULTAN. QazAqparat - «Aýyl» partııasy Almatyda azyq-túlik qaýipsizdigi jóninde dóńgelek ústel ótkizdi. Jıynda partııa atynan prezıdent saılaýyna qatysyp jatqan Tóleýtaı Raqymbekovtiń saılaýaldy baǵdarlamasy da talqylandy, dep habarlaıdy QazAqparat partııanyń resmı saıtyna silteme jasap.

Ó. Ospanov atyndaǵy Qazaq topyraqtaný jáne agrohımııa ǵylymı-zertteý ınstıtýty bazasynda ótken sharaǵa agrarlyq sala ǵalymdary, «Aýyl» HDPP Tóraǵasynyń orynbasary Tólegen Sydyqov jáne partııa aktıvi qatysty. Otyrys barysynda Agroónerkásiptik keshendi jáne aýyldyq aýmaqtardy damytý ǵylymı-zertteý ınstıtýtynyń dırektory e.ǵ.d. Altynbek Moldashev, QR Aýyl sharýashylyǵy ǵylymdary akademııasynyń akademıgi, b.ǵ.d. Másimjan Velıamov baıandama jasady. Olar óz baıandamalarynda azyq-túlik qaýipsizdigi jahandyq máselege aınalyp bara jatqanyn atap ótti.

«Naryqtyq ekonomıkadaǵy kez kelgen memleket azyq-túlik qaýipsizdigin qorǵaý máselesin aldyńǵy orynǵa qoıady. Otandyq ónimder men eksporttyq taýarlardyń sapasy basty nazarda bolýy tıis», - dedi olar.

Dóńgelek ústel barysynda qatysýshylarǵa ulttyq jáne aımaqtyq erekshelikterge qaraı qazaqstandyq azyq-túlik qaýipsizdigi standarttaryn ázirleý jóninde usynystar aıtyldy.

Sondaı-aq, sharaǵa qatysýshylar QR Prezıdenttigine kandıdat Tóleýtaı Raqymbekovtiń saılaýaldy baǵdarlamasyn talqylap, saılaýda kandıdatqa qoldaý bildirý jóninde sheshim qabyldady.