Almatyda ǵalym-gıdrogeolog Júrimbek Sydyqovqa memorıaldy taqta ornatyldy

ALMATY. QazAqparat - Almatyda kórnekti gıdrogeolog ǵalym, gıdrogeohımııa ǵylymynyń negizin qalaýshy, Ekinshi dúnıejúzilik soǵys ardageri, QR eńbek sińirgen ǵylym qaıratkeri, geologııa-mıneralogııa ǵylymdarynyń doktory, Memlekettik syılyqtyń laýreaty, QR UǴA akademıgi Júrimbek Sydyqovtyń qurmetine memorıaldy taqta ornatyldy, dep habarlaıdy QazAqparat tilshisi.

Almaty qalalyq mádenıet basqarmasy basshysynyń orynbasary Danııar Álıev óz sózinde Júrimbek Sydyqovtyń Qanysh Sátbaev, Ýfa Ahmedsafın, Nataı Kenesarın syndy tanymal ǵalymdardyń izbasary bolǵanyn atap ótti.

Memorıaldy taqta Q.I.Sátbaev atyndaǵy Qazaq ulttyq tehnıkalyq zertteý ýnıversıteti janyndaǵy Ý.M. Ahmedsafın atyndaǵy Gıdrogeologııa jáne geoekologııa ınstıtýtynyń qabyrǵasyna ornatyldy. Munda Júrimbek Sydyqov 70 jylǵa jýyq jumys istegen.

«Ol naǵyz zııaly edi, tereń ǵylymı bilimi, izgi nıeti men adamgershilik qasıetteri úshin áriptesteri men zamandastarynyń úlken qurmetine ıe boldy. Onyń eńbekteri ǵylymı qaýymdastyq pen memleket tarapynan joǵary baǵalanyp, marapattaldy. Júrimbek Sydyqovtyń ónegeli ómiri men jarqyn beınesi halqymyzdyń jadynda máńgi saqtalady. Almatylyqtardyń atynan barsha zııaly qaýymdy, stýdentterdi, ǵalymnyń izbasarlary men týystaryn memorıaldy taqtanyń ashylýymen shyn júrekten quttyqtaımyn», – dedi D. Álıev.

Kórnekti ǵalymdy eske alýǵa QR Parlamenti Senatynyń múshesi Baqytjan Jumaǵulov, QR Ulttyq ǵylym akademııasynyń prezıdenti Murat Jurynov, Q. I. Sátbaev atyndaǵy Qazaq ulttyq tehnıkalyq zertteý ýnıversıtetiniń rektory Meıram Begentaev keldi.

Júrimbek Sydyqov 1940 jyly qazaq orta mektebin úzdik bitirip, Ekinshi dúnıejúzilik soǵystyń bastalýyna baılanysty áskerge shaqyrylǵan. 1944 jyly úshinshi aýyr jaraqattan keıin áskerden oralyp, Qazaq taý-ken metallýrgııa ınstıtýtynyń geologııalyq barlaý fakýltetine oqýǵa túsedi.

1965 jyly doktorlyq dıssertatsııa retinde sátti qorǵaǵan Oral-Muǵaljar taýlary men Muǵaljar jazyǵynyń jerasty sýlaryn uzaq jyldar boıy zertteý nátıjeleri boıynsha irgeli monografııa jazdy. 35 monografııa, gıdrogeologııalyq ǵylymnyń túrli baǵyttary boıynsha 720 jumysty jarııalady.

Gıdrogeologııa jáne geoekologııa ınstıtýtynda Júrimbek Sydyqov jasaǵan 124 esep jáne kartalar bar. Onyń jetekshiligimen 11 doktorlyq jáne 25 kandıdattyq dıssertatsııa qorǵaldy.

Maıdan jyldaryndaǵy áskerı erligi úshin, sondaı-aq jemisti ǵylymı qyzmeti men ǵylymı kadrlardy daıarlaǵany úshin birinshi dárejeli Otan soǵysy ordenimen, Halyqtar Dostyǵy ordenimen jáne Qazaqstan Respýblıkasynyń 20-dan astam medaldarymen, basqa da qurmetti nagradalarmen marapattalǵan.

Ǵylym men tehnıka salasy boıynsha Qazaq KSR Memlekettik syılyǵyna, «Qazaq KSR eńbek sińirgen ǵylym qaıratkeri» qurmetti ataǵyna, akademık Q.I. Sátbaev atyndaǵy syılyqqa, Qazaqstan Respýblıkasy Ulttyq Ǵylym akademııasynyń úlken altyn medaline ıe bolǵan.