Almatyda Family turǵyn úı keshenin salýǵa kim ruqsat bergeni anyqtalyp jatyr
«Biz páterge 10 jyl aqsha jınap, ony Family turǵyn úı kesheninen satyp aldyq. Ótken jyldyń qazan aıynda qurylys salýshylarda barlyq ruqsat qujattary boldy. Keıin siz ózińiz qol qoıǵan barlyq qujatty qaıtaryp aldyńyz. Nátıjesinde qurylys salýshy sotqa berdi jáne sotta jeńdi. Alaıda, siz jerdi qaıtarý týraly sheshim qabyldadyńyz. Endi Family turǵyn úı kesheninen úı satyp alǵan men jáne 120 otbasy ne isteýi kerek», - dep suraq qoıdy qala turǵyny.
Erbolat Dosaev Family turǵyn-úı kesheni zańsyz salynǵanyn aıtty.
«Ol»Medeý«memlekettik óńirlik tabıǵı parkiniń quramyna kiretin Baým toǵaıynda ornalasqan, onyń aınalasyndaǵy sanıtarlyq aımaq 1 shaqyrym jerdi qamtıdy. Qazir qyzmettik tekseris júrip jatyr. Bul jobaǵa buryn kimniń ruqsat bergeni anyqtalýda. Men bul turǵyn úı keshenin salýǵa ruqsat bermedim. Aıta keteıin, men qalada barlyq nárseniń zańǵa sáıkes júzege asýyn qalaımyn. Bul jaǵdaı tek Family turǵyn úı kesheni úshin ǵana emes, qaladaǵy basqa da turǵyn úı keshenderine de qatysty. Qazirgi ýaqytta qurylys salýshylar bizge ártúrli nusqalardy usynady, ıaǵnı, úı qabattaryn azaıtý, jobany qaıta qaraý jáne t.b. Biz qalada tártip ornatý jumystaryn jalǵastyramyz, bári erejege sáıkes bolýy kerek», - dedi Erbolat Dosaev.
Ol sondaı-aq orynbasary Asqar Amrın atalǵan máselemen aınalysatynyn jetkizdi.
«Biz 120 otbasyn baspanasyz qaldyraıyn dep jatqan joqpyz. Bul jaǵdaıda men tıisti túrde áreket etýim kerek. Sebebi, men bul máselege bir ret kóz jumsam, keıin osyǵan uqsas jáne zańsyz máseleler shyǵa beredi.
Kompanııa óz mindettemelerin oryndasyn, úleskerlerge aqshalaryn qaıtarsyn. Keıin biz jobany qaıta qarastyramyz, múmkindik bolsa, ony iske asyramyz», - dedi Almaty ákimi Erbolat Dosaev.