Almatyda eskirgen 40 shaqyrym elektr jelileri jańartylyp jatyr

ALMATY. QazAqparat- Almaty ákimi Erbolat Dosaev Jetisý aýdany turǵyndarymen kezdesýinde aýdandaǵy ınjenerlik jelilerdi jańǵyrtý jumystary qalaı júrip jatqanyn aıtyp berdi, dep habarlaıdy QazAqparat tilshisi.

«Aýdan turǵyndaryn, atap aıtqanda, Palladın – Pavlodarskaıa – Selskaıa – Boraldaı kósheleri men Kemel shaǵyn aýdanynyń turǵyndaryn elektr qýatymen úzdiksiz qamtamasyz etý úshin 40 shaqyrym eskirgen jelilerdi rekonstrýktsııalaý jumystary júrip jatyr. Jumystar osy jyldyń tamyz aıynda bastaldy. Qazirdiń ózinde 800 tirek ornatylyp, 15,8 shaqyrym kabel tartyldy. Palladın – Pavlodarskaıa – Selskaıa – Boraldaı kóshelerindegi jumystar osy jyldyń sońyna deıin, Kemel shaǵynaýdanyndaǵy jumystar 2023 jyldyń sáýir aıynda aıaqtalady», - dedi megapolıs basshysy.

Onyń aıtýynsha, bul 4 myńnan astam abonentti úzdiksiz elektrmen qamtamasyz etýge múmkindik beredi. Osy jyldyń sońyna deıin Jetisý aýdanyndaǵy 6 kóshede jaryq júıesin jańartý jumystary júrgiziletin bolady.

Birinshi kezektegi jartylaı jaryq júrgizilmegen kóshelerdi jaryqtandyrý maqsatynda osy jyldyń sońyna deıin Jetisý aýdanyndaǵy 76 kóshege syrtqy jaryqtandyrý jelisin júrgizý jumystary aıaqtalady.

«Osy jyldyń qyrkúıek aıynda sizdermen kezdesken kezde Qulager shaǵyn aýdanyndaǵy jylýmen jabdyqtaý jelileriniń 1,7 shaqyrymyn rekonstrýktsııalaý jumystaryn tezdetý týraly másele kóterildi. Qulagerdegi jylý jelilerin rekonstrýktsııalaý qazan aıynyń sońynda aıaqtaldy. Qubyrlar jer astyna aýystyryldy, asfalt qalpyna keltirildi, eski jerústi qubyry bólshektep alynyp jatyr», - dedi qala ákimi.

Erbolat Dosaevtyń sózinshe, Qazybaev kóshesi, Rysqulov dańǵyly, Tátibekov kóshesi, Raıymbek dańǵyly bóligindegi uzyndyǵy 57,9 shaqyrym sýmen qamtý jelilerin rekonstrýktsııalaý jáne kanalızatsııa salý jumystary aıaqtalýǵa jaqyn. Bul rette qazylǵan barlyq kósheler bıylǵy qarasha aıynyń sońyna deıin tıisinshe qalpyna keltiriletin bolady.