Almatyda eski úılerdiń ornyna jańa turǵyn úı keshenderi salynyp jatyr
Almaty qalasy Túrksib aýdanynyń ákimi Baqytjan Aqjarov onlaın brıfıng barysynda eskirgen, turýǵa jaramsyz turǵyn úılerdiń ornynda qazirgi zamanǵy kóppáterli turǵyn úı keshenderi salynyp, eski úı turǵyndary kóshirilip jatqanyn málim etti.
Aýdan ákiminiń aıtýynsha, Túrksib aýdanynda 1209 kópqabatty kóppáterli turǵyn úı qory bar, onyń ishinde 609 úı eski turǵyn úı sanatynda (jalpy aýdany 166 myń sharshy metr 4965 páter).
«Osy jyldyń birinshi toqsanynda Aqynov, T. Moldaǵalıev, L. Tolstoı, Saýranbaev kósheleriniń kvadratynda 2 eki qabatty úı buzylyp, onyń ornyna 7 bes qabatty úıdiń qurylysy bastaldy. Sonymen qatar Osıpenko kóshesinde 59 otbasyn kóshirý úshin bes qabatty eki úıdiń qurylysy júrýde», - dedi Baqytjan Aqjarov.
Sonymen qatar, ol Kotelnıkov, Kassın kósheleri, S. Seıfýllın dańǵyly aýmaǵynda qurylys júrgizýshi – «Qazaq Stroy» JShS 100 menshik ıesin kóshirý úshin 2 bes qabatty úı salyp jatqanyn jáne taǵy 12 úı buzylatynyn atap ótti.
«Aýdannyń turǵyn úı alańyn keńeıtý maqsatynda 2021 jyldyń sońyna deıin jeke ınvestıtsııa esebinen 2704 páterli 53 kópqabatty úıdi paıdalanýǵa berý, sondaı-aq «Nurly jer» baǵdarlamasy aıasynda 2730 páterli toǵyz qabatty 35 úı salý josparlanýda»,- dedi ol.