Almatyda esirtki satýmen aınalysqan qylmystyq top ustaldy

ALMATY. QazAqparat – Almatyda arnaıy is-shara barysynda esirtki satýmen aınalysqan qylmystyq top ustaldy, dep habarlaıdy QazAqparat tilshisi.

Jedel-izdestirý sharalary kezinde Almaty qalasynda «gashısh» esirtkisin satýmen jáne taratýmen aınalysqan jeti adamnan turatyn qylmystyq top ustaldy.

«Belgili bolǵandaı, Almaty qalasynyń aýmaǵynda esirtki zattaryn zańsyz saqtaý jáne satý maqsatynda A. esimdi azamat uıymdasqan top quryp, oǵan jetekshilik etken. Atalǵan fakt boıynsha qylmystyq uıymnyń uıymdasqan tobyn qurý jáne basqarý, sondaı-aq olarǵa qatysý, qylmystyq isteri QR QQ-niń 262 babynyń 1 jáne 2 bóligi boıynsha tirkeldi. Ustalǵandardan jáne tintý júrgizgen jerden travmatıkalyq tapansha, bir tegis uńǵyly myltyq, jalpy salmaǵy 4,8 keli «gashısh» esirtkisi tárkilendi», – dedi Almaty qalalyq PD Esirtki qylmystarymen kúres basqarmasynyń bastyǵy Erlan Almaǵambetov.

Kúdiktilerge qatysty myna baptar boıynsha qylmystyq is qozǵaldy:

– QR QK-niń 262-baby, 1.2-bóligi (Uıymdasqan qylmystyq top qurý jáne uıymdastyrý) – eki qylmystyq is;

– QR QK-niń 297-baby 1-3-bóligi (Esirtki satý) – 22 qylmystyq is;

– QR QK-niń 296-baby 4-bóligi (Esirtkini asa iri kólemde saqtaý) – eki qylmystyq is;

– QR QK-niń 287-baby, 2-bóligi (Atys qarýyn zańsyz saqtaý) – eki qylmystyq is;

– QR QK-niń 302-baby 2-bóligi (Esirtki jasaıtyn jerdi ustaý) – bir qylmystyq is.