Almatyda Esentaı ózeniniń kópirinde jóndeý jumysy táýlik boıy júrip jatyr

ALMATY. QazAqparat - Ál-Farabı dańǵylymen Esentaı ózeninen ótetin kópir rekonstrýktsııasynyń birinshi kezeńi aıaqtaldy, dep habarlaıdy QazAqparat tilshisi.

Kópirdi jóndeýden ótkizip jatqan «Qapshaǵaı kópir qurylysy kompanııasy» JShS basshysy Rodıon Tenniń aıtýynsha, mundaı qurylys-montaj jumystary úshin ádette 9 aı qajet.

Almaty ákimi Erbolat Dosaevtyń tapsyrmasy boıynsha keptelis boldyrmaý jáne qala turǵyndaryna qolaısyzdyqty azaıtý úshin jumys jedel qarqynmen aıaqtalady.

Ol úshin kúndiz de, túnde de birneshe qurylys brıgadasy jumys isteıdi.

Búginde 27 dana dińgektiń 9 qatary bólshekteldi. Kelesi kezeń 7 tamyzǵa deıin - 33 dińgek, al 30 tamyzǵa deıin - taǵy 36-sy bólshekteledi.

«Árıne, kópirdi tolyǵymen jaýyp, ony birden tolyqtaı qalpyna keltirsek, bizge ońaı bolar edi. Biraq bári Almatynyń iri megapolıs ekenin túsinedi, al ál-Farabı - qala turǵyndary kún saıyn jumysqa baratyn jáne basqa da sharýamen júretin qarbalas dańǵyl. Sondyqtan kópir ishinara jabylady, keri qozǵalys engiziledi», - deıdi ol.

Rodıon Ten bul qurylym shamamen 70-jyldardyń aıaǵy men 80-jyldardyń basynda salynǵanyn jáne eshqashan jóndelmegenin atap ótti.

Ár jyldary joldardy jóndeý kezinde kópirge asfalttyń barlyq jańa qabaty tóseldi.

Nátıjesinde asfaltbetonnyń qalyńdyǵy 16 sm jetti. Artyq qabattar aralyq qurylymdarǵa qosymsha júkteme túsirip, qurylymnyń júk kótergishtigin tómendetedi.

«Eger siz kópirdiń astyna tússeńiz, tirek konstrýktsııalary men betondardyń qabyrshaqtanǵanyn, shuńqyrlardy, sonymen qatar, armatýranyń ashylýymen aralyqtardyń qorǵanys qabatynyń buzylǵanyn kóresiz. Aqaýlar negizinde kópirdiń jalpy jaǵdaıy «qanaǵattanarlyqsyz» jáne «óte aýyr» dep baǵalanady, ıaǵnı is júzinde apat aldyndaǵy jaǵdaı. Eger ákimdik kópirdi tolyq qaıta qurý jóninde sheshim qabyldamasa, qaýipti bolar edi»,- deıdi qurylys kompanııa basshysy.

Aıtýynsha,osy rekonstrýktsııa aıasynda kópir tek nyǵaıtylyp qana qoımaı, 8 jolaqqa deıin keńeıtilip, jol tóseminiń deńgeıine sáıkes 40 sm kóteriledi.

Al jaıaý júrginshiler kópirleri eki jaqta bólek turǵyzylady.

«Balalar, velosıpedshiler jáne múmkindigi shekteýli adamdardy, arbalardy kóterýge jáne túsirýge yńǵaıly bolý úshin pandýstar salynady. Kópirdiń astyndaǵy ótkel de keńeıtilip, jóndeledi», - dep qorytyndylady qurylys kompanııasynyń dırektory.

Buǵan deıin Esentaı ózeni arqyly ótetin kópir 1 qyrkúıekte paıdalanýǵa beriletinin jazǵan bolatynbyz.