Almatyda Esentaı ózeniniń arnalary bekitilip jatyr

ALMATY. QazAqparat - Almaty ákimi Baýyrjan Baıbek jumys sapary kezinde ál-Farabı dańǵylynyń ońtústigine qaraı ornalasqan Esentaı ózeni arnalaryn bekitý jumysynyń qarqynyn tekserdi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.

Óıtkeni, jazda ózen jaǵalaýyndaǵy trotýarlardy, sport alańdaryn abattandyrý jáne jaryq jelilerin júrgizý bastalady. 4000 aǵash otyrǵyzý josparlanǵan.

Qazirgi kezde 1,8 shaqyrymǵa sozylǵan aýmaqqa tirek qabyrǵalaryn ornatý, ózen túbine temirbeton tóseý jáne tehnıkalyq joldardy abattandyrý jumystarynyń 65 paıyzy oryndaldy. Atqarylǵan sharalar ýchaskede sý aýqymyn kúndelikti ótkizý qýatyn 10 ese arttyrady.

Jobany iske asyrý barysynda «Tokyo Rope Almaty» zaýytynda shyǵarylatyn otandyq ónimder qoldanylyp jatyr. Óndirýshi álemdik joǵary sapaly standartqa saı aýyr gabıondarǵa 50 jyldan astam kepildik berip otyr.

Megapolıs basshysy seldiń aldyn alý jumystaryna erekshe nazar aýdarylatynyn atap ótti. Sońǵy úsh jyl ishinde sel qaýpi bar ýchaskeler 67-den 12-ge qysqardy, toǵyz ózenniń arnalary rekonstrýktsııalandy jáne 300 shaqyrym aryq jelisi qaıta jasaldy.

Budan ózge, Almatyda «Aqsaı» jáne «Aıýsaı» jańa sý bógetterin salý josparlanǵan. «Myńjylqy» sý bógetin rekonstrýktsııalaý aıaqtalyp qaldy. Ermensaı, Kereńqulaq, Úlken jáne Kishi Qarasý sııaqty tórt ózenniń arnalary bekitilip, abattandyrylyp jatyr.

Qarǵaly ózeniniń boıyndaǵy uzyndyǵy 7,7 shaqyrym bolatyn aýmaq bekitilip, abattandyrylýda. GES 1 - ÚAK men Medeý-Shymbulaq betkeılerindegi qaýipti ýchaskelerge qorǵanys qondyrǵylary ornatylyp, bekitilgen.