Almatyda Erlan Qııasov pen Sádýaqas Baıǵabulov arasyndaǵy daý-damaı tekserildi

ALMATY. QazAqparat - Memlekettik qyzmet isteri agenttiginiń Almaty qalasy boıynsha departamenti aǵymdaǵy jyly Ádep jónindegi keńesiniń alǵashqy otyrysyn ótkizdi, dep habarlaıdy QazAqparat tilshisi.

Departament BAQ-qa monıtorıng júrgizý barysynda Almaty qalasy sanıtarlyq-epıdemıologııalyq baqylaý departamenti (SEBD) basshysynyń orynbasary Sádýaqas Baıǵabulovqa qatysty teris jarııalanymdy anyqtady.

Jıynda málim bolǵandaı, Sádýaqas Baıǵabulov «Informburo.kz» aqparattyq portalynda QR Bas memlekettik sanıtarlyq dárigeri bolǵan Erlan Qııasovtyń qyzmetine qatysty Ádep normalarymen janaspaıtyn pikir bildirgen.

«Qyzmettik tergeý barysynda E.Qııasovtyń Almaty qalasynyń Bas memlekettik sanıtarlyq dárigerin taǵaıyndaý týraly buıryq shyǵarǵany S.Baıǵabylovpen ádepke jat sózderdiń aıtylýyna sebep bolǵandyǵy anyqtaldy.

Osylaısha, S.Baıǵabulov tarapynan Ádep kodeksiniń 11-tarmaǵynyń, 12-tarmaǵynyń 3) tarmaqshasynyń talaptary saqtalmaǵan, sebebi, memlekettik qyzmetshiler BAQ-ta qate nysanda pikir talastyryp, memlekettiń laýazymdy tulǵalarynyń atyna ádepke saı emes pikir bildirgen.

Ádep jónindegi keńes músheleriniń sheshimi negizinde S.N.Baıǵabulovty «eskertý» túrinde tártiptik jaýapkershilikke tartý usynyldy», - delingen habarlamada.

Aıta keteıik, Erlan Ańsaǵanuly Qııasov ózi bergen ótinishke sáıkes Qazaqstan Respýblıkasy Úkimetiniń qaýlysymen QR Densaýlyq saqtaý vıtse-mınıstri — QR Bas memlekettik sanıtarlyq dárigeri qyzmetinen bosatylǵan bolatyn .