Almatyda er adam bir túnde jedel járdem kóligin, taǵy birneshe kólikti urlap qashqan

ALMATY. QazAqparat - Almaty oblysynda 28 jastaǵy er adam bir túnde úsh kólikti birinen soń birin aıdap áketken. Olardyń biri jedel-járdem qyzmetiniń mashınasy, dep habarlaıdy QazAqparat tilshisi.

Áleýmettik jelide polıtseılerdiń jedel járdem kóligin ustaǵan vıdeo tarady.

Almaty polıtsııasyna, aldymen, 31 shilde kúni keshki saǵat 21.45-te Qulja tasjolynyń boıyndaǵy turǵyn úı kesheniniń aýmaǵynan «BMW» kóligi urlanǵany týraly habarlama túsken.

Turǵyn úı kesheninen shyǵa bergende kólik urlaýshy «Aýdı» kóligimen soqtyǵysyp, oqıǵa ornynan qashyp ketken. Kóp uzamaı Esik qalasynda qarsy jolaqqa shyǵyp ketip, «Toyota» kóligimen soqtyǵysqan. Ol jerde kólikti tastap, jaıaý boı tasalaýǵa tyrysqan.

Kóp uzamaı kúdikti bir boıjetkeniń «Nissan» kóligin tartyp alyp qashpaq bolǵanda, aýdarylyp qaldy.

Oqıǵaǵa kýá bolǵandar jedel járdem shaqyrǵan kezde er adam medıtsınalyq brıgada kóligin de urlap ketken.

«Oblystyq jedel járdem qyzmetine tıesili «Jac Sunray» kóligimen ol qalaǵa qaıta kelgende patrýldik polıtsııa ekıpajy qolǵa túsirdi. Kúdikti – 1994 jyly týǵan er adam, medıtsınalyq kýálandyrý barysynda esirtki tutynǵany anyqtaldy», - dep habarlady polıtsııadan.

Medeý aýdandyq polıtsııa basqarmasynda, sondaı-aq Eńbekshiqazaq aýdandyq polıtsııa bólimshesinde bóten kólikterdi zańsyz basyp alý derekteri boıynsha úsh qylmystyq is tirkeldi.

Sonymen qatar úsh jol kólik oqıǵasy boıynsha resmı is qozǵaldy.

Oqıǵanyń mán-jaıy anyqtalyp jatyr.