Almatyda elektrli samokattardyń jyldamdyǵyna shekteý engizildi

ALMATY. QazAqparat – Almatyda samokat tebe almaıtyndarǵa jyldamdyq saǵatyna shamamen 20 shaqyrymǵa deıin shekteldi, dep habarlaıdy QazAqparat tilshisi.

«Qalada samokattarǵa qatysty sheshim qabyldandy, tártipke keltirýge kiristik. Biraq, zańnyń qabyldanýyn kútip otyrmyz. Zańǵa engiziletin ózgerister men tolyqtyrýlar bıyl kúzde qabyldanady. Qala deńgeıinde merdigerlermen memorandýmǵa qol qoıdyq, olar qazirdiń ózinde saıabaq aýmaqtarynan shyqty. Qazir osy úsh iri operatorǵa arnaıy avtoturaqtardy qarastyryp jatyrmyz. Tártip buzýshylar – erejelerdi saqtamaıtyn qalanyń jas turǵyndary. Memorandým aıasynda tamyzdyń aıaǵyna deıin tártip áldeqaıda jaqsarady dep senemiz. Zań shyqqansha, bul máseleni qalamyzdyń ishki sheshimderimen qarastyramyz», - dedi Almaty ákimi Erbolat Dosaev.

Qalalyq mobıldilik basqarmasynyń basshysy Ǵanı Myrzahanovtyń aıtýynsha, Almatyda ortaq seriktestikterdiń elektrli samokattaryna qazirdiń ózinde shekteý qoıylǵan.

«Jyldamdyq saǵatyna 25 shaqyrym. Bul – samokat tebýdi endi úırenip júrgenderge. Al, samokat tebýdi úırenbegenderge saǵatyna shamamen 20 shaqyrym bolady», - dedi Ǵanı Myrzahanov.

Buǵan deıin Qazaqstanda elektrli samokattardy paıdalaný ulttyq standartynyń jobasy ázirlengeni týraly jazǵan bolatynbyz.

Aıta keteıik, Almaty qalasynyń ákimdigi men elektrli samokattardy jalǵa beretin operatorlar megapolıste qural qoldanysyn retteý maqsatynda yntamaqtastyq pen ózara túsinistik týraly memorandýmǵa qol qoıǵan .

Memorandým aıasynda elektrli samokattarmen jaıaý júrginshiler jolaǵynda, saıabaqtarda jáne buqaralyq is-sharalar ótetin qoǵamdyq oryndarda júrýge tyıym salynady.