Almatyda Elbasyǵa startap jobalary tanystyryldy
Memleket basshysyna ortalyqtyń jetekshi startap jobalary («Chocofamily» kompanııalar toby, Nommi jobasy jáne SmartSatu platformasy) tanystyryldy. Olar taǵamǵa tapsyrys berý jáne áýe bıletterin satý jónindegi ınternet-gıpermarket, taýar jetkizýshiler men tutynýshylar arasyndaǵy taýar aınalymyna arnalǵan alań, sondaı-aq búkil álem boıynsha ınternetke jyldam ári meılinshe yńǵaıly qosylýdy kózdeıtin Wi-Fi roýter ázirlemesi retinde jumys isteıdi.
Elbasy memleket tarapynan «Tsıfrlyq Qazaqstan» baǵdarlamasynyń iske asyrylýyna zor mán berilip otyrǵanyn atap ótti.
«Arnaıy mınıstr men vıtse-premer taǵaıyndaldy, ár mınıstrlikte osy máselelermen aınalysatyn adamdar bar. Biz álemde bolyp jatqan úderisten qalyp qoımaýymyz kerek. Biz tsıfrlandyrýdyń arqasynda, ásirese, óndirýshi kompanııalardyń eńbek ónimdiligin jyldam arttyra alamyz dep úmittenemin», - dedi Qazaqstan Prezıdenti.
«Chocofamily» ınternet holdınginiń negizin qalaýshylardyń biri ári bas dırektory Ramıl Mýhorıapov Nursultan Nazarbaevqa ІT-salasy men jalpy tsıfrlandyrý úderisine zor mán berip otyrǵany úshin alǵys aıtty.
«Biz ІT-qoǵamdastyǵy atynan «Tsıfrlyq Qazaqstan» baǵdarlamasy úshin ózińizge shynaıy rızashylyq bildiremiz. Biz sonyń arqasynda órkendep kelemiz. Aqparattyq tehnologııalardan basqa birde-bir sala mundaı jyldamdyqpen damı almaıdy. Biz Qazaqstandaǵy ınternet naryqtyń kóshbasshysy bolyp qana qoımaı, halyqaralyq deńgeıge de jetip, úlken kompanııalar qura alatynymyzǵa senimimiz zor», - dedi kompanııa basshysy.
Elbasyna memlekettik qyzmet kórsetý reglamentterimen qamtylmaǵan, qalyptan tys ómirlik ahýaldy retteý jónindegi «OpenAlmaty» qoǵamdyq qabyldaý ornynyń jumysy tanystyryldy. Oǵan 7 aıdyń ishinde 18 396 ótinish túsip, olardyń 78 paıyzy sol jerde jedel sheshimin tapty.
Aıta keterligi, SmArt.Point jobasy - Almatydaǵy tehnologııalardy damytýǵa arnalǵan keńistik. Onda joǵary tehnologııalar men kreatıvti bıznes salasynda jumys isteıtin 40 kompanııa ornalasqan. Olardyń jıyntyq aqsha aınalymy 100 mıllıon dollardan asady. Qyzmet etý baǵyttary elektrondy saýda, qarjy tehnologııasy, avtomattandyrylǵan logıstıka, medıa, kompıýterge arnalǵan baǵdarlamalardy ázirleý, telekommýnıkatsııa, blokcheın, zańgerlik jáne býhgalterlik qyzmet kórsetý aýtsorsıngi, bilim tehnologııalary sııaqty salalardy qamtıdy.
IT-hab jalpy kólemi 9 myń sharshy metrdi qamtıtyn eki qabatty ǵımaratta ornalasqan. Munda bir ýaqytta jeke oryndardy nemese 7-8 qyzmetkerge arnalǵan ofısterdi jalǵa alatyn 700 adamǵa deıin jumys isteı alady.
Bul nysan aptanyń jeti kúninde 24 saǵat boıy ashyq turady. Munda kelissóz júrgizý bólmeleri, oıyn alańdary jáne sport zaly bar. Ortalyq kovorkıng qaǵıdaty boıynsha salynǵan jáne ár túrli mamandyq pen salalardyń adamdaryn biriktiredi.