Almatyda «Elbasy saıabaǵy» ashyldy

ALMATY. QazAqparat- Búgin ál-Farabı atyndaǵy Qazaq ulttyq ýnıversıtetinde Qazaqstan Táýelsizdiginiń 30 jyldyǵyna oraı «Elbasy saıabaǵy» ashyldy, dep habarlaıdy QazAqparat tilshisi ál-Farabı atyndaǵy QazUÝ baspasóz qyzmetine silteme jasap.

QR Tuńǵysh Prezıdenti – Elbasy Nursultan Nazarbaevtyń qurmetine boı túzegen aǵashtar alleıasyna 300-ge jýyq alma, shıe, qara órik aǵashy otyrǵyzyldy.

Elbasy bilim ordasyna kelgen saparynda «Ál-Farabı atyndaǵy QazUÝ – jańa Qazaqstannyń bilimi men ǵylymynyń aldyńǵy shebi» dep atap ótip, ulttyq ýnıversıtetterge úlken úmitpen qaraıtynyn bildirgen edi.

Sonymen qatar Tuńǵysh Prezıdent respýblıkamyzdyń basqarý júıesinde otyrǵan bilikti mamandar men talantty ǵalymdardyń, daryndy pedagogtardyń úlken toby osy kıeli shańyraqtan shyńdalyp shyqqanyn basa aıtqan.

Memleket basshysy Qasym-Jomart Kemeluly Toqaev «Táýelsizdik bárinen qymbat» baǵdarlamalyq maqalasynda «Bıyl qasterli Táýelsizdigimizge 30 jyl tolady. Bul – qaıta jańǵyrǵan qazaq memleketiniń, ata-babalarymyz ańsaǵan azattyqtyń tuǵyry nyǵaıa túskenin áıgileıtin mańyzdy beles. Osynaý tolaǵaı tabystardyń bárine Elbasynyń dara kóshbasshylyǵynyń hám halqymyzdyń danalyǵy men parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik» dep Ult Kóshbasshysynyń eren eńbegine laıyqty baǵa bergen bolatyn.

«Sol sebepten qazaq bilimi men ǵylymynyń qara shańyraǵy Táýelsizdiktiń 30 jyldyǵy aıasynda Elbasyna aıryqsha tartý jasaý týraly sheshim qabyldady» delingen habarlamada.

Aǵash otyrǵyzý jumysyna karantın talaptaryn saqtaı otyryp, arnaıy qyzmetkerler jumyldyryldy.