Almatyda «El úmiti» jobasynyń úzdik qatysýshylary marapattaldy

ALMATY. QazAqparat – Almaty ákimi Baqytjan Saǵyntaev Tuńǵysh Prezıdent qorynyń «El úmiti» jobasy aıasynda júzege asyrylǵan «Elbasy medali» baǵdarlamasy men «El maqtanyshy» syılyǵynyń jeńimpazdaryn marapattady, dep habarlaıdy QazAqparat tilshisi.

«El úmiti» jobasy Tuńǵysh Prezıdent — Elbasy N. Nazarbaevtyń bastamasymen júzege asyp jatyr. Jastar jylynda Elbasy daryndy, belsendi jáne shyǵarmashyl jastardy júıelik negizde qoldaý qaǵıdatyn bekitýdi usyndy.

Baǵdarlamaǵa 14-29 jas aralyǵyndaǵy 571 almatylyq qatysty, onyń 90-y medalmen marapattaldy.

Zııatkerlik olımpıadada jeńimpaz bolǵan bes oqýshy jáne olardy saıysqa daıyndaǵan 15 muǵalim «El maqtanyshy» syılyǵymen marapattaldy.

Bıyl ıntellektýaldy saıystarǵa qalanyń 359 oqýshysy qatysyp, onyń 237-si júldeli oryndarǵa ıe boldy.

Qala ákimi B. Saǵyntaev Tuńǵysh Prezıdent — Elbasynyń arnaıy marapat ıelerin quttyqtaı kele, daryndy jastardy qoldaý sharalary jáne bilim alý men qabiletti jan-jaqty damytý úshin jaǵdaı jasaý týraly aıtty.

Bıyl qoldaý sharalary aıasynda 500-den astam jas muǵalim 30 mln teńgege materıaldyq kómek aldy. Sondaı-aq, muǵalimderdi qarjylaı qoldaý maqsatynda jalaqy 2020 jyldyń 1 qańtarynan bastap 25% ósti.

Sonymen qatar, 2020 jyldan bastap alǵash ret óz jumysynda joǵary kórsetkishterge qol jetkizgen qalanyń úzdik muǵalimderi úshin aqshalaı syılyqpen qatar, Almaty qalasy ákiminiń arnaıy granttary engizildi.

2 bólmeli páter men avtokólik jyl saıynǵy qalalyq «Almaty muǵalimi» baıqaýynyń jeńimpazdaryna tapsyrylyp otyrdy.

Sonymen birge muǵalimderdiń turmystyq jaǵdaıyn jaqsartý jumysy jalǵasyp jatyr. Osylaısha, bıyl 266 jas muǵalim úımen qamtamasyz etildi.