Almatyda EKSPO-ǵa arnalǵan velojarys ótti

ASTANA. QazAqparat - Almatyda «Astana EKSPO-2017» halyqaralyq mamandandyrylǵan kórmesine arnalǵan velojarys ótti, dep habarlaıdy «QazAqparat» HAA tilshisi qalalyq dene tárbıesi jáne sport basqarmasyna silteme jasap.

Saıystar qalalyq «Sporttyq Almaty» buqaralyq sportty damytý baǵdarlamasy aıasynda uıymdastyryldy.
 

«Jańbyrly aýa raıyna qaramastan, qala kóshelerinde velosıpedpen 10 shaqyrym júrý úshin 500-ge jýyq adam jınaldy.  Dástúr boıynsha velojarys 09:00-de ál-Farabı dańǵyly men Táttimbet kóshesiniń qıylysyndaǵy «Nurly taý» bıznes ortalyǵy aýmaǵynda bastaldy jáne M.Gorkıı atyndaǵy mádenı jáne demalys parkinde márege jetti», - delingen habarlamada.
 

Velojarysqa qatysýshylar arasynda qaptósek, shatyr, EKSPO-ǵa bıletter sekildi utystar oınatyldy, eń basty júlde  velosıped almatylyq Janbolat Qanalınge berildi. 
 

«Men velojarystarǵa  únemi qatysamyn. Búgin jalǵyz keldim, al negizi «Hameleon» toby birge velosıped tebemiz. Toǵyz jyldan beri velosıped teýip kelemin, bul istiń naǵyz mamany bolǵan shyǵarmyn. Júlde utyp alǵanyma qýanyshtymyn. Keleside taǵy qatysamyn», - dedi jeńimpaz.

Uıymdastyrýshylar bıyl «Sporttyq Almaty» qalalyq buqaralyq sportty damytý baǵdarlamasy aıasynda 20 velojarys ótetinin atap ótti.