Almatyda ekologııany jaqsartý máselesi talqylandy

ALMATY. QazAqparat – Almatyda QR ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıteti tóraǵasy Zýlfýhar Joldasov ekobelsendilermen jáne Almaty qalasynyń uıymdarymen birge megopolıstiń ekologııalyq problemalaryn keshendi sheshý boıynsha Jol kartasyn iske asyrýdy talqylady, dep habarlaıdy QazAqparat tilshisi.

Sharaǵa QR Ulttyq ekonomıka, Indýstrııa jáne ınfraqurylymdyq damý, Energetıka mınıstrligi men Almaty qalasy ákimdiginiń ókilderi qatysty.

QR ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıteti tóraǵasy Zýlfýhar Joldasov Almaty eń las qalalardyń qatarynda ekenin atap ótti.

«Almaty birneshe jyl boıy eldegi eń las qalalardyń tiziminde tur. Oǵan jylý kózderinen shyǵatyn qaldyqtar jáne joldaǵy kólikterdiń keptelisi sebep boldy. 2019 jylǵy esep boıynsha atmosferaǵa 114 myń lastaıtyn zat bólingen, onyń 34 paıyzy jylý kózderinen, 52 paıyzy kólikten jáne 14 paıyzy jeke sektordan shyqqan. JEO-3 jáne JEO -2-ni gazǵa almastyrý kerek», - dedi ol.

Aldaǵy jyldary JEO-2 gazǵa aýystyrý josparlanyp otyr. Alǵashqy gaz qazandyqtary 2023 jyly iske qosylady. Joba quny 98 mlrd teńge.

Búgingi kúni «Samuryq-Energo «AQ « Almaty JEO-2 modernızatsııasy» jobasynyń tehnıkalyq-ekonomıkalyq negizdemesin ázirleýde.Jylý elektr ortalyǵyn gazǵa aýystyrý shyǵaryndylardy 83% tómendetýge múmkindik beredi. Sondaı-aq kúkirt dıoksıdi sııaqty ýly zattar múldem joǵalady.

«Qazirgi ýaqytta Qasym-Jomart Toqaevtyń tapsyrmasy boıynsha mınıstrlik ákimdiktermen jáne múddeli memlekettik organdarmen birlesip, tıisti sharalardy eskere otyryp, Nur-Sultan jáne Almaty qalalarynda ekologııalyq problemalardy keshendi sheshý boıynsha Jol kartasyn ázirleý ústinde», - dep túsindirdi spıker.