Almatyda ekologııalyq bilim áleýetin arttyrýǵa arnalǵan trenıng bolyp ótti
Úsh kún bolyp ótken trenıngke Qyrǵyzstan, Ózbekstan, Tájikstan jáne óz elimizdiń ekologııalyq bilim berý qoǵamdyq uıymdary, memlekettik organdardyń qyzmetkerleri jáne UEU ókilderi qatysty. Qatysýshylar «Mekteptegi «Green Pack-Ortalyq Azııa» atty CD-taspa nusqasyndaǵy zamanaýı mýltımedıalyq bilim baǵdarlamasy boıynsha dáris aldy. Qorshaǵan orta jaıynda bilim alýǵa arnalǵan mýltımedıalyq materıaldar jınaǵynda qorshaǵan orta jáne onyń turaqty damýy salasyna arnalǵan 25 taqyryptyq aqparattar engizilgen. Bul nusqa Ortalyq Azııa aýmaǵyndaǵy qorshaǵan orta máselelerine arnalǵan.
Jattyqtyrýshylar, muǵalimder «Tabıǵı orta», «Jaǵymsyz áserler», «Ekonomıka jáne qorshaǵan orta», «Jahandyq máseleler», «Qundylyqtar» atty bes bólimge bólingen baǵdarlamamen tanysty. Ár elden kelgen qatysýshylar endi óz elderinde mektepterge, ÚEU-ǵa osy mýltımedıalyq bilim baǵdarlamasy boıynsha dáris oqıtyn bolady. Ár oqytýshyǵa bir taspadan berilip, arnaıy sertıfıkat tabystaldy.
«Trenıngtiń maqsaty - UEU-dyń, Orta Azııadaǵy bes el memlekettik qyzmetkerleriniń, sonymen qatar, orta bilim mektep oqytýshylarynyń qorshaǵan orta máseleleri boıynsha áleýetin arttyrý bolyp tabylady. Bul joba Ortalyq jáne Shyǵys Eýropanyń 16 elinde, Reseıde, Ázirbaıjanda, Túrik elinde iske asýda. Ótken jyly bul joba Ortalyq Azııa elderine keldi. Ony bizdiń ortalyq iske asyrýda», - dedi Ortalyq Azııanyń aımaqtyq ekologııalyq ortalyǵynyń joba koordınatory, baǵdarlamanyń menedjeri Tatıana Shakırova.
Onyń aıtýynsha, 20-25 jeltoqsan kúnderi qazaq mektepteriniń oqytýshylaryna arnalǵan trenıng ótkizilmek. Onda elimizde ózekti bolyp tabylatyn radıatsııalyq belsendilik, taýlar men muzdyqtar, shóleıttený máseleleri boıynsha dárister oqylatyn bolady.