Almatyda eki mamandandyrylǵan HQO-da júrgizýshi kýáligine emtıhan tapsyrýǵa bolady

ALMATY. QazAqparat – Almatylyqtar eki mamandandyrylǵan halyqqa qyzmet kórsetý ortalyǵynda júrgizýshi kýáligine praktıkalyq emtıhan tapsyra alady, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy» KEAQ Almaty qalasy boıynsha fılıalynyń halyqqa qyzmet kórsetý jónindegi №1 mamandandyrylǵan bóliminiń avtodromy 2013 jylǵy qańtardan bastap jumys isteıtin, al №6 mamandandyrylǵan bóliminiń avtodromy taıaýda ǵana ashyldy.

«Mamyr aıynyń sońynda 1000 sharshy metr alańda avtomattandyrylǵan avtodrom ashylyp, onda kólik quralyn basqarý quqyǵyn alýǵa praktıkalyq emtıhannyń birinshi kezeńi qabyldandy. Búgingi tańda bólim Almaty qalasynyń jáne Almaty oblysynyń jaqyn mańdaǵy aýdandarynyń turǵyndaryna qyzmet kórsetedi. Avtodrom ashylǵan kúnnen bastap 9 242 júrgizýshi kýáligi berildi», - dep atap ótti fılıal dırektory Danııar Qyryqbaev.

Almaty mamandandyrylǵan HQO-nyń avtodromdarynda júrgizý boıynsha emtıhannyń praktıkalyq bóligin tapsyrý kezinde adamı faktordy tolyǵymen boldyrmaıtyn zamanaýı elektrondyq baqylaý júıesi qoldanylady. Ol arnaıy tehnıkalyq quraldar men qurylystar keshenin qamtıdy jáne A, V, S, D sanattaryndaǵy júrgizýshilerdiń kólikti basqarý daǵdysyn baǵalaý úshin paıdalanylady.

«Barlyq azamattar praktıkalyq emtıhandy qalaı tapsyratyny, avtomattandyrylǵan avtodrom degen ne jáne emtıhan sońynda baǵa qalaı qoıylatyny týraly naqty bile bermeıdi. Muny túsiný úshin tájirıbe qajet. Kóptegen júrgizýshilerdiń jumys kúni oqýǵa múmkindigi joq. Sondyqtan, demalys kúni jattyǵýǵa nıet bildirýshiler úshin «Saıaly» shaǵyn aýdanynda ornalasqan №1 mamandandyrylǵan HQO-nyń avtodromy ashyq bolady», - deıdi Danııar Qyryqbaev.

«Avtomattandyrylǵan elektrondyq alańda praktıkalyq emtıhan tapsyrýǵa emtıhan aldy daıyndyqty júrgizý» memlekettik qyzmetin paıdalaný úshin, azamat oqý kúnine deıin 2 kún buryn mamandandyrylǵan HQO-ǵa júginýi jáne qyzmet kórsetýge shart jasasýy qajet. Bul rette ózińizben birge tek jeke kýáligińiz bolý kerek.

Bolashaq júrgizýshiler munda kólik quralyn basqarý daǵdylaryn baqylaý men baǵalaýdyń elektrondyq júıesimen jabdyqtalǵan mamandandyrylǵan HQO avtokóligin paıdalana alady.

Danııar Qyryqbaevtyń aıtýynsha, onda tájirıbeli nusqaýshylar jumys isteıdi, olar jabdyqtalǵan avtodromda jáne jol-kólik jelisinde avtokólik júrgizýdi úıretedi. Munda mindetti emtıhan elementterin jasaýǵa bolady.

Jyl basynan beri Almatynyń eki mamandandyrylǵan HQO-synda 100 myńnan astam júrgizýshi kýáligi berilgen, olardyń 60 myńnan astamy avtodromdarda emtıhan tapsyrý nátıjesinde alynǵan.

Aıta keteıik, №1 mamandandyrylǵan halyqqa qyzmet kórsetý ortalyǵy Alataý aýdany, «Saıaly» shaǵyn aýdanyndaǵy Aqqaınar kóshesi 1-úı jáne №6 mamandandyrylǵan HQKO Jetisý aýdany, «Kemel» shaǵyn aýdanyndaǵy Aqsýat kóshesi 118-úıde ornalasqan. Onda barlyq normatıvtik talapqa sáıkes keletin avtomattandyrylǵan avtodrom jumys isteıdi..