Almatyda dúńgirshekterdi tonaǵan úsh qyz ben eki jigit ustaldy
20:36, 15 Qańtar 2022
ALMATY. QazAqparat - Almatyda dúńgirshekterdi tonaǵan qylmyskerler ustaldy. Olar urlanǵan zattardy páterde qoqys qapshyqtaryna salyp qoıǵan, dep habarlaıdy QazAqparat tilshisi.
Áýezov aýdanynyń polıtsııa qyzmetkerleri qylmystyq jolmen alynǵan zattar saqtalǵan páterdi anyqtady.
Onda úsh qyz jáne eki jas jigit turǵan. Suǵanaqtardyń «Asia Park» saýda úıinde ornalasqan býtıkterdi tonaǵany anyqtaldy.
Olar páterlerinde kórshilerden alǵan tisteýikterdiń kómegimen urlanǵan kıimderdiń magnıttik japsyrmalaryn julyp tastaǵan.
Polıtsııanyń aqparatyna sáıkes, ustalǵandardyń eń kishisi 19 jasta, úlkeni 28-de. Almatyǵa elimizdiń basqa aımaqtarynan kelgen. Zattaı aıǵaqtary tárkilendi. Qazir kúdiktiler qamaýǵa alyndy.