Almatyda dızeldi avtobýstardy satyp alýǵa tyıym salynady

ALMATY. QazAqparat - Almatyda dızeldi avtobýstardy satyp alýǵa tyıym salynady. Bul týraly Erbolat Dosaev ótken juma kúni Qazaqstan Prezıdenti Qasym-Jomart Toqaevqa esep berý barysynda aıtty, dep habarlaıdy QazAqparat tilshisi.

Shahar basshysynyń sózinshe, megapolıste qoǵamdyq kóliktiń ekologııalyq túrlerine tolyq kóshýi boıynsha belsendi jumys júrgizilip jatyr.

«2023 jyly 1 430 birlik ekologııalyq kólik jetkiziledi, onyń ishinde jergilikti bıýdjet esebinen 600 avtobýs pen 100 trolleıbýs. Jeke tasymaldaýshylar 730 avtobýs, onyń ishinde 30 elektrobýs satyp alatyn bolady. Kelesi jyldan bastap dızeldi avtobýstardy satyp alýǵa tyıym salynady», - dedi Erbolat Dosaev.

Aıtýynsha, atalǵan sharalar qoǵamdyq kólikti ekologııalandyrý deńgeıin 2023 jyldyń ózinde-aq 60%-ǵa jáne 2025 jylǵa qaraı 100%-ǵa deıin jetkizýge múmkindik beredi.

Eske salaıyq, Memleket basshysy 18 tamyz kúni Almatyǵa is saparmen kelgen bolatyn.