Almatyda dinı rásimderge balalardy qatystyrǵan 4 birlestik hatshysy jazalandy

ALMATY. QazAqparat - Almatyda dinı rásimderge kámelettik jasqa tolmaǵandardyń qatysýyna jol bergen 4 dinı birlestiktiń basshysyna qatysty ákimshilik hattama toltyryldy.

Bul týraly óńirlik kommýnıkatsııalar qyzmetinde Almaty qalasy Din isteri jónindegi basqarmasynyń basshysy Esenbekov Aıdar aıtty, dep habarlaıdy QazAqparat tilshisi.

«16 jasqa tolmaǵan balalardy ata-anasynyń biriniń kelisiminsiz dinı rásimderge qatystyrý zańmen qýdalanady. Almatyda osyndaı 4 jaǵdaı boldy. 9-15 jastaǵy balalardyń ata-analary dinı rásimderge qatysýǵa qarsylyq bildirip, sotqa júgingen. Atap aıtqanda, balalar Ehoba kýágerleri, protestanttyq dindegi «Istochnık jıznı» uıymdarynyń rásimderine zańsyz qatysqan. Ózderińizge belgili, osydan birneshe jyl buryn balalardyń, stýdentterdiń juma kezinde sabaqtan qalýy jıi beleń alyp ketti. Endi osy máselege qatysty din salasyndaǵy zańnamaǵa birqatar ózgerister engiziletin bolady», - dedi Aıdar Esenbekov.

 Onyń aıtýynsha, jalpy alǵanda Almatyda byltyr QR ÁqK 490 baby boıynsha 36 ákimshilik hattama toltyryldy.

«Sonyń ishindegi dinı mazmundaǵy ádebıetterdi taratý boıynsha - 14, dinı rásimderdi belgilengen oryndardan tys ótkizý - 6, jergilikti atqarýshy organnyń ruqsatynsyz mıssıonerlik qyzmetti júzege asyrý - 12, dinı rásimderge kámelet jasqa tolmaǵandardyń qatysýy bóliginde dinı birlestik tarapynan shara qabyldamaýy boıynsha 4 ákimshilik hattama toltyryldy», - dedi ol.

Atalǵan ister boıynsha barlyǵy 3 784 050 teńge kóleminde aıyppul salynǵan.