Almatyda Dinı birlestikter arasynda ústel tennısinen saıys ótti
Almaty ákimdiginiń Qoǵamdyq damý basqarmasy jáne qalalyq Dinı birlestikter basshylary klýbynyń uıymdastyrýymen ústel tennısinen saıys ótti. Dinı birlestikter klýbynyń basshysy Kákimjan Bıshmanovtyń aıtýynsha, týrnırge qatysýshylar sany jospardaǵydan eke ese kóp bolǵan.
«Dinı birlestikter músheleriniń sport oıyndaryna qyzyǵýshylyǵy artyp keledi. Búgingi saıysqa qatysýshylar sany týrnır bastalar aldynda kúrt artty. Keıbir sport sharalaryna eki júzge deıin qatysýshy tirkelgen kezder boldy. Buryn krıshnaıtter, baptıster jáne taǵy basqa dinı birlestikter ókilderi mundaı sharalarǵa kóp qatysa bermeıtin. Biz olarǵa mundaı sharalar synaý úshin uıymdastyrylmaıtynyn aıtyp túsindirdik. Osyǵan deıin shahmattan ashyq týrnır ótkizdik. Birinshi oryndy Qazaqstan Musylmandary dinı basqarmasynyń jigitteri ıelendi. Bul jerge eshkim shapan kıip kelmeıdi. Eshbir dinı birlestik múshesi óz dinin nasıhattamaıdy», - dedi Kákimjan Bıshmanov.
Onyń aıtýynsha, Almaty qalalyq Dinı birlestikter basshylary klýby osydan úsh jyl buryn qurylǵan. Maqsaty – dinı birlestikter músheleri arasynda qarym-qatynasty kúsheıtip, beıbitshilik, yntymaqty nasıhattaý.
«Biz ótken aptada «Krıshnanyń kelýi» degen krıshna qaýymdastyǵynyń merekesine qatystyq. Onyń aldynda, Qurban aıt merekesinde klýbpen meshitke bardyq. Ózge dinı senimdegi adamdar aıaq-kıimin sheship meshitke kirdi. Qurban aıt etinen aýyz tıip, dastarhandas boldy. Jınalyp murajaı, teatrlarǵa baryp turamyz. Klýb músheleri bolyp qoǵamdaǵy áleýmettik jaǵdaılardy talqylaımyz. Dinı birlestik jetekshileriniń deni ǵylymı dárejesi bar adamdar», - dedi K. Bıshmanov.
Klýb basshysy atap ótkendeı, Almaty qalasynyń dinı birlestikter jetekshileri Qazaqstannyń Din týraly zańyn ázirleý barysynda kóp úles qosqan.
Ata zań kúnine oraı uıymdastyrylǵan ústel tennısi saıysyna júzge jýyq adam qatysty. Jeńimpazdar baǵaly syılyqtarmen marapattaldy.
Almas Muqashuly