Almatyda Dımash Qudaıbergen beınelengen mýral jóndeledi

ALMATY. Almatyda - Qazaqstandyq tanymal ánshi Dımash Qudaıbergen beınelengen mýral qalpyna keltiriledi, dep habarlaıdy QazAqparat tilshisi.

Almaly aýdany turǵyndarynyń biri ákimmen kezdesýde jóndeý jumystary kezinde Dımash Qudaıbergen beınelengen mýral búlingenin aıtty.

«Biz, turǵyndar, osy senbide qabyrǵa sýretin qalpyna keltirgimiz keledi. Bizge esh kedergi bolmasa eken», - dedi ol.

Erbolat Dosaev bul ıdeıany qoldap, turǵyndarǵa kómektesýge ýáde berdi.

«Men sizge kómektesemin. Senbi kúni qajettiniń barlyǵyn jasaý úshin aýdan ákimi múlik ıeleri qaýymdastyǵynan adamdardy jınaıdy»,- dedi qala ákimi.

Eske salaıyq 2020 jyldyń jazynda Almatynyń ortalyǵyndaǵy úılerdiń biriniń qabyrǵasynda Dımash Qudaıbergen beınelengen sýret paıda bolǵan edi.

Keıin tanymal ánshi Almatyda kópqabatty úıdiń qabyrǵasyna sýretin salǵan adamdarǵa alǵys aıtty.