Almatyda densaýlyq saqtaý salasynda tórt nysannyń qurylysy júrip jatyr

ALMATY. QazAqparat - Búginde Almatyda densaýlyq saqtaý salasynyń tórt nysanyna qurylys jáne seısmoturaqtylyqty kúsheıtý jumystary júrip jatyr. Bul týraly óńirlik kommýnıkatsııalar qyzmetiniń brıfıngide Almaty qalasy qurylys basqarmasy basshysynyń orynbasary Ulan Ońalbaev aıtty, dep habarlaıdy QazAqparat tilshisi.

«Qalamyzda jergilikti atqarýshy organdar densaýlyq saqtaý júıesin damytýǵa erekshe kóńil bóledi, halyqqa medıtsınalyq kómek kórsetý boıynsha belsendi jumys júrip jatyr. Emhanalar men aýrýhanalar zamanaýı medıtsınalyq jáne tehnologııalyq jabdyqtarmen jabdyqtalǵan. Búginde densaýlyq saqtaý salasynda tórt nysannyń qurylysy jáne seısmoturaqtylyqty kúsheıtý jumystary jalǵasyp jatyr», - dedi Ulan Ońalbaev.

Onyń aıtýynsha, shaharda balalar jedel medıtsınalyq járdem ortalyǵynyń qabyldaý bólimshesiniń jańa korpýsy, «Kemel», «Mamyr» shaǵyn aýdandarynda 200 oryndy otbasylyq-dárigerlik ambýlatorııasy salynyp jatyr.

Sonymen birge, bıyl «Nurshashqan», «Qarasý», «Saıaly» shaǵynaýdandary men Aıbasov kóshesinde ornalasqan otbasylyq-dárigerlik ambýlatorııalardyń qurylysy bastalady.

«Tamyz aıynda «Aınabulaq» shaǵynaýdanyndaǵy №11 qalalyq aýrýhana ǵımaratynyń seısmoturaqtylyǵyn kúsheıtý jumystary aıaqtaldy. Bıyl 80 myń tósek-oryndy №7 qalalyq klınıkalyq aýrýhananyń qabyldaý bólmesi paıdalanýǵa berildi», - dedi spıker.