Almatyda «Deni saý bala – ult bolashaǵy» atty halyqaralyq konferentsııa ótip jatyr

ALMATY. QazAqparat – Almatydaǵy S.D.Asfendııarov atyndaǵy Qazaq ulttyq medıtsına ýnıversıtetinde «Deni saý bala – ult bolashaǵy», «Pedıatrııalyq ǵylymnyń ıntegratsııasy, bilim jáne tájirıbe» taqyrybynda eki birdeı halyqaralyq ǵylymı-praktıkalyq konferentsııa ótip jatyr, dep habarlaıdy QazAqparat tilshisi.

Sharaǵa Reseı, Lıtva, Koreıa, Túrkııa eliniń pedıatr mamandary men ǵalymdary, QR densaýlyq saqtaý mınıstrliginiń jáne QR bilim jáne ǵylym mınıstrliginiń ókilderi, QR medıtsınalyq joǵary oqý oryndarynyń qyzmetkerleri, respýblıkanyń úzdik pedıatrlary men qalalyq densaýlyq saqtaý uıymdarynyń mamandary qatysýda.

Іs-sharanyń basty maqsaty - QR pedatrııa salasynyń búgini men bolashaǵyn saralaý, balalarǵa medıtsınalyq kómek kórsetýdi jaqsartý.

Konferentsııa barysynda pedıatrııa ǵylymy, bilim berý men praktıkanyń ıntegratsııasy, pedıatrııa salasyndaǵy jetistikter, pedıatrııalyq qyzmettiń negizgi máseleleri talqylandy.

Atap aıtqanda, náresteler men balalar ólim-jitimin odan ári tómendetý máseleleri, dıagnostıkalaý jáne emdeýdiń jańa tıimdi tehnologııalaryn engizý; alǵashqy medıtsınalyq-sanıtarlyq kómek deńgeıinde medıtsınalyq kómektiń sapasyn jaqsartý, hırýrgııalyq patologııasy bar balalarǵa kórsetiletin joǵary tehnologııalyq medıtsınalyq kómektiń jańa túrlerin engizý men damytý, pedıatrııa ǵylymyn damytý jáne balalardyń densaýlyǵyn saqtaý qyzmetinde ınnovatsııalyq tehnologııalardy engizý, elimizdiń joǵary oqý oryndarynda sapaly pedıatr kadrlaryn daıarlaý máselesi de kóterildi.

Shara aıasynda el naryǵyndaǵy medıtsınalyq jáne farmatsevtıkalyq ónimderdiń kórmesi uıymdastyryldy.

Konferentsııa eki kúnge sozylady.