Almatyda dene shynyqtyrý páni muǵalimderi qysqarmaıdy – basqarma

ALMATY. QazAqparat - Megapolıs mektepterinde dene shynyqtyrý páni boıynsha saǵattar qaıta bólinetin bolady. Bul týraly Almaty qalalyq bilim basqarmasy basshysynyń orynbasary Aıdyn Saılaýbaı aıtty, dep habarlaıdy QazAqparat tilshisi.

«Qazirgi ýaqytta dene shynyqtyrý pániniń sabaq saǵatynyń qysqarýyna baılanysty muǵalimderdiń qysqarýy bolǵan joq. Sabaq bergen muǵalimderdiń bári qaldy. Árqaısysyna saǵattar bólek qaıta bólinedi. Dene shynyqtyrý muǵalimderi qysqarmaıdy» - dep jaýap berdi jýrnalısterdiń suraǵyna spıker.

Buǵan deıin QR Oqý-aǵartý mınıstrligi jańa oqý jylynan bastap mektepterde dene shynyqtyrý sabaǵyn shaǵyn toptarǵa bólmeý sebebin túsindirip bergen edi.

Keıin Qazaqstandyq salalyq bilim jáne ǵylym qyzmetkerleri kásipodaǵy dene shynyqtyrý pánin oqytýda synypty toptarǵa bólmeý jumys isteıtin pedagogter sanynyń qysqarýyna ákeletindigin aıtyp, dabyl kótergen bolatyn. Osy jaıtqa oraı QR Oqý-aǵartý mınıstri Ashat Aımaǵambetov te pikir bildirdi.

Aıta keteıik, búginde elimizde dene shynyqtyrý sabaǵy boıynsha 500 myńnan astam saǵat bar. Al pán muǵalimderiniń sany shamamen 30 myń pedagogti quraıdy.