Almatyda De Montfort University resmı túrde ashyldy

ALMATY. QazAqparat - Almatyda De Montfort University resmı túrde ashyldy. Jańa joǵary oqý orny bıznes, ekonomıka jáne quqyq, AT, kreatıvti ındýstrııa salalarynda brıtandyq dıplomy bar mamandardy daıarlaıtyn bolady, dep habarlaıdy primeminister.kz.

De Montfort University Kazakhstan-nyń resmı ashylý saltanatyna QR Premer-Mınıstriniń orynbasary Eraly Toǵjanov, Almaty ákimi Baqytjan Saǵyntaev, QR mádenıet jáne sport mınıstri Aqtoty Raıymqulova, QR bilim jáne ǵylym vıtse-mınıstri Sholpan Karınova, Ulybrıtanııanyń halyqaralyq saýda mınıstri Ranıl Djaıavarden, Ulybrıtanııanyń Qazaqstandaǵy elshisi Ketı Lıch qatysty.

QR Premer-Mınıstriniń orynbasary E. Toǵjanov quttyqtaý sózinde De Montfort University Kazakhstan elimizdegi ǵana emes, Ortalyq Azııadaǵy ozyq joǵary oqý oryndarynyń biri bolatynyna senim bildirdi.

«Ýnıversıtettiń negizgi artyqshylyqtarynyń biri – túlekterdiń básekege qabilettiligi. Bas joǵary oqý ornyn bitirgen jastardyń 97%-y oqý bitirgennen keıin jarty jyl ishinde jumys tabady jáne IBM, Microsoft, BMW sııaqty kompanııalarda jumys isteıdi», — dedi E. Toǵjanov.

Premer-Mınıstr orynbasarynyń aıtýynsha, JOO jyl saıyn jalpy qabyldaý sanynyń keminde 7% kóleminde Qazaqstan azamattaryna granttar men stıpendııalar bóledi degen ýaǵdalastyqqa qol jetkizilgen.

«Biz qazaqstandyq fılıaldyń túlekteri Anglııadaǵy kampýs túlekteri sııaqty básekege qabiletti bolady dep úmittenemiz», — dedi E. Toǵjanov.

Óz kezeginde Almaty ákimi B. Saǵyntaev Almaty qalasynyń kreatıvti ındýstrııalar saıasatyn júzege asyrýda ýnıversıtettiń erekshe ról atqaratynyn atap ótti.

«Biz úshin bul rasynda da óte mańyzdy. Qalanyń odan ári ósýi, eńbek ónimdiligi, ómir sapasy men bıznes múmkindikteri boıynsha álemniń 100 úzdik qalasynyń qataryna ený jónindegi maqsatymyzǵa jetý úshin bizge ekonomıkany ártaraptandyrý boıynsha jumysty jalǵastyrý qajet», — dedi qala ákimi.

B. Saǵyntaevtyń aıtýynsha, osy maqsatta qala ekonomıkasynda qurylymdyq manevr júrgizilýde. Bul – jańa ekonomıkalyq ósýdiń draıverlerine aınalatyn tsıfrlandyrýdy, týrızmdi jáne kreatıvti ındýstrııalardy damytý. JOO rektory Dj. Paýnder Almaty ákimi B. Saǵyntaevqa ýnıversıtettiń ashylýyna qoldaý kórsetkeni jáne jaǵdaı jasaǵany úshin alǵys aıtty.

Bul Qazaqstanda oqýǵa lıtsenzııa alǵan jáne úzdik bilim berý standarttaryn engizý úshin qurylǵan alǵashqy sheteldik ýnıversıtet. Túlekterge Ulybrıtanııanyń DMU Lester Ýnıversıteti dárejesi beriletin bolady. Bakalavrıatqa túsken alǵashqy 145 stýdent qabyldaýdan oıdaǵydaı ótti.

«Býhgalterlik esep jáne qarjy», «Bıznes jáne marketıng», «Ekonomıka jáne halyqaralyq qatynastar», «Bıznes-quqyq», «Qarjy jáne ınvestıtsııalar» baǵyttary boıynsha bilim berý baǵdarlamalary qarastyrylǵan.

Budan basqa, oqytý baǵdarlamasynda aqparatty tehnologııa, kreatıvti ındýstrııa mamandyqtary ıntegratsııalanatyn bolady. Al atalǵan baǵyttarǵa Almatynyń 2050 jylǵa deıingi damý strategııasynda erekshe kóńil bólinedi.

«Dóńgelek ústel» barysynda qazaqstandyq jáne brıtandyq taraptar Qazaqstannyń kreatıvti ekonomıka sektoryn damytý jáne yntymaqtastyq múmkindikterin talqylady.