Almatyda dástúrli mýzykalyq aspaptardyń kórmesi ashyldy

ALMATY. QazAqparat – QR Memlekettik ortalyq mýzeıinde Ulystyń uly kúni – Naýryz merekesine jáne Táýelsizdiktiń 30 jyldyǵyna oraı mýzeı qoryndaǵy qazaqtyń dástúrli mýzykalyq aspaptary kollektsııasynan «Babadan qalǵan syrly áýen» atty kórme ashyldy, dep habarlaıdy QazAqparat tilshisi.

Memlekettik ortalyq mýzeıiniń bólim basshysy Marjan Júnisovanyń aıtýynsha, qazaq halqynyń tarıhı-mádenı, áleýmettik jáne rýhanı ómirinde mýzyka óneri erekshe oryn alady.

Sondaı-aq, qazaq halqynyń san ǵasyrlyq mýzykalyq dástúri urpaqtan-urpaqqa berilip otyratyn halyq shyǵarmashylyǵynyń ajyramas bóligi. Qazaq halqynyń mýzyka mádenıetiniń negizin án, aýyzeki dástúrge negizdelgen sýyryp salmalyq, epıkalyq, sondaı-aq aspaptyq shyǵarmalar quraıdy.

QR Memlekettik ortalyq mýzeıi qoryndaǵy 200-ge jýyq mýzykalyq aspaptar negizinde uıymdastyrylyp otyrǵan «Babadan qalǵan syrly áýen» kórmesine mýzykalyq aspaptardyń ishekti, úrmeli, tilsheli, soqpaly túrleri – jetigen, sherter, qobyz, sybyzǵy, sazsyrnaı, asataıaq, tuıaq, qońyraý jáne taǵy basqa túrleri qoıylǵan. Sonymen qatar qazaq úshin zattyq jáne áýezdik tól mura bolýymen birge ult úshin sımvolıkalyq nyshan bolyp tabylatyn dombyranyń san alýan túrleri erekshe qyzyǵýshylyq týdyrady.

«Kórmede kelýshiler nazaryna qazaqtyń uly aqyny Abaıdyń jary – Dilda Alshynbaıqyzynyń qos ishekti qalaq dombyrasy, qazaq tarıhy men mádenıetindegi shoqtyǵy bıik tulǵalar - Ámire Qashaýbaev, Jaıaý Musa, M. Erjanov, E. Ómirzaqov, K. Baıseıitova, sondaı-aq, Q. Sátbaev, Q. Amanjolov, J. Moldaǵalıev, Á. Jangeldın, K. Aqyshev, Ó. Jánibekov jáne taǵy da basqa ǵylym, mádenıet jáne óner adamdarynyń mýzykalyq aspaptary usynylady»,-deıdi Marjan Júnisova.

«Babadan qalǵan syrly áýen» kórmesine mýzykalyq aspaptarmen qatar, sahnalyq aksessýarlar, beıneleý óneri týyndylary da qoıylady.