Almatyda dárilik zattardyń aınalymyna baqylaý kúsheıtildi
Almaty qalalyq polıtsııa departamenti habarlaǵandaı, «Dármek» is-sharasynyń basty maqsaty – dárihanalarda esirtki zattaryn anyqtaý bolyp tabylady.
«Tájirıbe kórsetkendeı, qalanyń keıbir dárihanalarynan quramynda esirtkisi bar preparattardy satyp alý qıyn emes. Uıyqtatatyn dári retseptsiz satylady. Baǵasy 1500 teńge ǵana. Osylaısha, «Aınabulaq-2» yqsham aýdanynda bizdiń bólimsheniń qyzmetkerleri Jetisý aýdandyq polıtsııa basqarmasyndaǵy áriptesterimen birlesip, 28 jastaǵy Sh. esimdi azamatty ustady. Odan bir oram uıyqtatatyn dári tabylyp, tárkilendi.
Ustalǵan azamattyń aıtýynsha, preparatty ol aýdandaǵy dárihanalardyń birinen satyp alǵan. Qalanyń Alataý aýdanynda taǵy bir adam ustaldy. 20 jastaǵy I. esimdi azamat retseptsiz kóz tamshylaryn satyp alǵan. Osy máseleniń ózektiligin eskere otyryp, ІІM-niń bastamasymen kúshti áser etetin zattardyń qataryna qosý arqyly keıbir dárilik zattardyń aınalymyna baqylaý kúsheıtildi. Bul Qazaqstan Respýblıkasy Úkimetiniń 2021 jyldyń maýsym aıyndaǵy 396 «Adamnyń ómiri men densaýlyǵyna zııanyn tıgizetin kúshti áser etetin zattardyń tizimin anyqtaý týraly» qaýlysynda kórsetilgen», – dedi Almaty qalalyq polıtsııa departamentiniń Esirtki qylmysyna qarsy kúres basqarmasynyń bastyǵy Erlan Álmaǵambetov.
Sondaı-aq ol «Dármek» jedel aldyn alý is-sharasy qyzmetiniń negizgi baǵyttarynyń biri QR QK-niń 303-babynda (Esirtki quraldarymen kúresý qaǵıdalaryn buzý) kózdelgen quqyq buzýshylyqtardy anyqtaý ekenin atap ótti.