Almatyda dárigerler tapshy

ALMATY. QazAqparat - Almatyda medıtsına salasynda kadr jetispeýshiligi áli de ózekti kúıinde qalyp otyr. Bul jóninde Óńirlik kommýnıkatsııa ortalyǵynda ótken brıfıng barysynda qalalyq qoǵamdyq densaýlyq basqarmasy basshysynyń orynbasary Laýra Myrzaǵalı málim etti, dep habarlaıdy QazAqparat tilshisi.

Onyń aıtýynsha, densaýlyq saqtaý uıymdarynda 216 dáriger men 214 orta medıtsına qyzmetkeri tapshy.

«Medıtsınalyq uıymdarda anestezıolog-reanımatologtar, jalpy tájirıbelik dárigerler, pedıatrlar, ýchaskelik terapevter, eresekter men balalar nevropatologtary, akýsher- gınekologtar jetpeıdi»,- deıdi Laýra Myrzaǵalı.

Sonymen qatar, ol bul máseleni sheshý úshin 2021-2025 jyldarǵa arnalǵan kadr tapshylyǵyn joıý jónindegi jol kartasy ázirlengenin atap ótti.

«Jol kartasyna sáıkes, 120-dan asa tapshy mamandyq boıynsha rezıdentterdi daıarlaýǵa jergilikti bıýdjetten 1 oqý jylyna 386 mln teńge somasynda qarjy bólindi. Sondaı-aq, orta medıtsınalyq qyzmetkerlerdi oqytýǵa 391 grant berildi jáne óte tapshy mamandyqtar boıynsha dárigerlerge 10 qyzmettik páter bólý josparlanýda»,- deıdi ol.