Almatyda dári-dármektiń joqtyǵyna shaǵym túsken joq – QR DSM

ALMATY. QazAqparat – Geosaıası jaǵdaıǵa baılanysty Almatyǵa dári-dármekterdi jetkizý máselesi joq. Bul týraly Óńirlik kommýnıkatsııalar qyzmetiniń brıfınginde QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Almaty qalasy boıynsha departamenti basshysynyń orynbasary Murat Muhamedıarov aıtty, dep habarlaıdy QazAqparat tilshisi.

Brıfıng barysynda jýrnalıst spıkerge Valıdoldy qalada tek ortalyq dárihanadan tabýǵa bolatynyn aıtty.

«Búgingi kúni bizdiń departamentke qandaı da bir dárilik preparattardyń joqtyǵyna qatysty shaǵym túsken joq. Bilýimshe, Valıdoldy birneshe óndirýshi bar, olar – Ýkraına, Reseı óndirýshileri. Valıdol máselesin anyqtaımyz», - dedi Murat Muhamedıarov.

Ol sondaı-aq buǵan deıin Tsıtramondy jetkizýde irkilis bolǵanyn aıtty.

«Eger preparattar bolmasa, olardyń analogy bizde bar ekenin aıtqym keledi. Keıde belgili bir aýrýdy emdeý úshin qajet belsendi zattar aralas dári-dármekterdiń quramynda bolatyn kezder bolady. Sondyqtan, qandaı da bir preparat bolmaǵan jaǵdaıda, ony almastyratyn dári-dármekterdi tańdaý úshin emdeýshi dárigermen keńesýdi usynamyn», - dedi Murat Muhamedıarov